«American Idol» шоусининг собиқ иштирокчиси ва пастор хотинини ўлдиришда айбдор деб топилди

American Idol шоусининг собиқ иштирокчиси ва пастор хотинини ўлдиришда айбдор деб топилди

Бир вақтлар American Idol теле-истеъдодлар шоусида қатнашган Огайо штатидаги собиқ мусиқа пастори хотинини ўлдирганликда айбдор деб топилди.

40 ёшли Калеб Флинн шу йилнинг 16 февралида Огайодаги уйларида ухлаб ётган рафиқаси Эшли Флинннинг бош орқа қисмига икки марта ўқ узган, сўнгра уни ўғрилар ўлдирганини айтишга уринган.

Ҳакамлар ҳайъатига қарор қабул қилиш учун уч соатдан камроқ вақт керак бўлди.

Флинн, шунингдек, ўзига қўйилган бошқа саккизта айблов, жумладан, оғирлаштирувчи ҳолатларда қотиллик ва далилларни сохталаштириш бўйича ҳам айбдор деб топилди. Энди у шартли озод қилиш ҳуқуқисиз умрбод қамоқ жазосига маҳкум этилиши мумкин.

Сешанба куни Флинн устидан олиб борилаётган суд жараёнида якуний нутқлар якунланди ва саккиз кунлик гувоҳликлар бериш жараёнига чек қўйилди. Ушбу жараёнда суд залида прокурорларнинг таъкидлашича, у ўзи дон олишиб юрган аёлга бағишлаб ёзган қўшиқ ҳам қўйиб эшиттирилди.

Суд давомида прокурорлар полициянинг боди-камера тасвирлари, шунингдек, қотиллик содир этилган вақт атрофида Флинннинг iPhone ва Apple Watch қурилмаларидаги фаолликни ўз ичига олган далилларни тақдим этдилар.

Улар, шунингдек, ўнлаб гувоҳларни, жумладан, унинг собиқ маъшуқаси, черковда амалиёт ўтаб юрган вақтида танишган Аллейга Ботнерни ҳам чақиришди.

Уларнинг 100 000 та матнли хабарларидан айримлари суд залида овоз чиқариб ўқиб эшиттирилди. Ҳимоя томони ҳеч қандай гувоҳ чақирмади.

«Кеча тунда соат 4 гача йиғлаб чиқдим, тўғриси, уни қандай ўлдиришни ва қамоққа тушмаслик йўлларини ўйладим», деб ёзган Флинн 2025 йил август ойида 24 ёшли Ботнерга йўллаган хабарида.

Бошқа бир хабарда у: «Мен шунчаки унинг ўлишини ва йўқолишини хоҳлайман», деб ёзган.

Сешанба кунги якуний нутқлар чоғида Майами округи прокурори Пол Уоткинс асосий эътиборни Флинннинг матнли хабарларига қаратди ва улар Флинннинг хотинига бўлган «нафратини» кўрсатишини айтди.

Суд залида Флинннинг вақти-вақти билан ҳиссиётга берилиб, бурнини тортиб, кўз ёшларини артаётгани кузатилди.

Уоткинснинг айтишича, 16 февраль куни эрта тонгда полиция Типп Ситидаги оиланинг уйига етиб келганида, Флинн зобитларга ўқ овозини эшитган пайтда қизларининг ётоқхонасида ётганини айтган.

Флинн гаражнинг ён эшиги очиқ эканлигини пайқаганидан сўнг, ётоқхонада 37 ёшли хотинининг жасадини топганини айтган.

Уоткинснинг сўзларига кўра, Флинн кейинроқ терговчиларга гаражга бормаганини айтган ва бу унинг аввалги кўрсатмасига зид келган.

Флинннинг ҳимоячиси Патрик Маллиган эса судда ҳеч қандай аниқ далил йўқлигини айтиб: «Бир нечта аҳамиятсиз деталларни бир-бирига боғлаш ишнинг ечими эмас», деди.

Маллиганнинг таъкидлашича, масала Флинннинг яхши эр бўлган-бўлмаганида эмас ва вафосизлик далили қотиллик далили бўла олмайди.

«Улар қуролни топа олишмаяпти, шунинг учун бунда уни айблашяптими?» деб сўради Маллиган Флиннга қўйилган далилларни сохталаштириш айбловига ишора қилиб.

Флинннинг юк машинаси консолида сақланган қуроли терговчилар воқеа жойига етиб келиб, юк машинасининг марказий консоли очиқ эканлигини аниқлаганидан бери бедарак йўқолган.

Суд жараёнининг аввалроқ қисмида Ботнер Флинн билан деярли 18 ойлик муносабатлари ҳақида икки кун давомида кўрсатма берди.

Уларнинг баъзи ёзишмаларини ўқиб бериш билан бирга, у сунъий интеллект томонидан яратилган қўшиқ матнини ҳам сатрлаб тушунтириб берди.

Ҳакамлар ҳайъатининг қўшиққа бўлган муносабати, жумладан, кулгандек туюлган лаҳзалари акс этган видео ижтимоий тармоқларда кенг тарқалди.

Прокурорлар, шунингдек, Огайо жиноий қидирув бюросининг махсус агенти Жозеф Вильгельмни гувоҳ сифатида чақиришди.

Унинг айтишича, хотинининг ўлимидан олдин Флинннинг телефонидан бир нечта иловалар, жумладан Instagram ва сунъий интеллект ёрдамида мусиқа яратувчи илова ўчириб ташланган.

Мусиқа яратувчи илова, Вильгельмнинг сўзларига кўра, «унинг Аллейга Ботнер билан муносабатларига тегишли» бўлган.