Алтман: АГИ йил охиригача пайдо бўлиши мумкин
ОпенАИ бош директори Сем Алтман инсон даражасидаги кенг қамровли интеллектуал вазифаларни бажаришга қодир умумий сунъий интеллект - АГИ 2026-йил охиригача пайдо бўлиши мумкинлигини билдирди. Компания ўзининг АГИ ҳақидаги тушунчасига мос келадиган ички тизим яратишни режалаштирмоқда.
**Алтман: АГИ йил охиригача пайдо бўлиши мумкин**
ОпенАИ бош директори Сем Алтманнинг фикрича, бундай технологиянинг дастлабки кўринишлари 2026-йил охирига қадар юзага келиши мумкин.
Алтман ТИМЕ журналида чоп этилган материалда ОпенАИ компаниянинг ўзи АГИ деб ҳисоблайдиган мезонларга мос ички тизим яратишни режалаштираётганини айтган.
Шу билан бирга, ҳозирча умумий сунъий интеллектнинг барча мутахассислар томонидан қабул қилинган ягона таърифи йўқ.
ОпенАИ АГИъни иқтисодий жиҳатдан муҳим бўлган аксарият фаолият турларида инсонлардан устун кела оладиган юқори даражадаги автоном тизимлар сифатида таърифлайди.
Компания вакиллари АГИ яратиш йўлида сезиларли ютуқларга эришилганини билдирмоқда. ОпенАИ бош илмий ходими Марк Ченнинг баҳосига кўра, компания АГИ яратиш мақсадига тахминан 80 фоиз яқинлашган.
ОпенАИ ҳаммуассиси ва президенти Грег Брокман эса компания ўз режаларини амалга ошира олса, келажакда 2026-йил охири АГИ пайдо бўлган давр сифатида баҳоланиши мумкинлигини айтган.
Компания бу йўналишдаги истиқболли ишланмаларидан бири сифатида келажакдаги Астра моделлари линиясини кўрсатмоқда.
ОпенАИ бош илмий ходими Якуб Пахоцкининг таъкидлашича, Астра тадқиқотга оид вазифаларни ҳозирнинг ўзида стажёр даражасида бажара олади.
Алтман эса мижозларнинг бир гуруҳига моделнинг дастлабки версияси намойиш этилган тадбирда Астра янги ва аҳамиятли нарсаларни ихтиро қилишга қодир бўлган биринчи модел бўлиши мумкинлигини айтган.
Унинг фикрича, бундай қобилиятлар тизимни АГИ тушунчасига жуда яқинлаштиради.
Бироқ ОпенАИънинг ушбу баёнотлари ҳозирча мустақил равишда тасдиқланмаган. Компания Астра имкониятлари батафсил баён қилинган техник ҳисоботни ҳам ҳали эълон қилмаган.
Шу сабабли АГИ 2026-йил охиригача яратилиши ҳақидаги баҳо ҳозирча ОпенАИ раҳбарлари ва мутахассисларининг прогнозлари бўлиб қолмоқда.