Алп тоғларида миллиардерлар учун 100 метрлик ерости бункерлари қурилади
Швейсария Алп тоғларида миллиардерларнинг мулкларини сақлаш учун ерости омборлари қурилмоқда. Хоналарга олтин, нақд пул, санъат асарлари ва автомобиллар жойлаштирилиши режалаштирилган.
Алп тоғларида миллиардерлар учун 100 метрлик ерости бункерлари қурилмоқда. Бу ҳақда Билд нашри хабар берди.
Швейсариянинг марказий қисмида жойлашган Брюниг массивида 100 метрдан чуқурроқда барпо этилаётган ушбу иншоот лойиҳа муаллифлари томонидан "деярли ҳар қандай эҳтимолий таҳдиддан" – ҳар қандай ҳужум ёки фалокатдан ҳимояланишни таъминлашга қаратилган. Шу мақсадда омборлар тоғ массивининг ичкарисида жойлаштирилади.
Лойиҳа ортида тадбиркор Томас Гассерга тегишли Швейсариянинг Брüниг Мега Сафе компанияси турибди. Қурилиш ишлари 2026-йилнинг январ ойида бошланган бўлиб, компания вакилининг сўзларига кўра, юқори хавфсизлик ҳудудидаги дастлабки ишлар аллақачон якунланган. Кейинги босқичда эса омборхоналарга киришни таъминлайдиган портал қурилади.
Гассер Швейсариянинг РЦ телеканалига берган интервюсида: "Хавфсизлик даражаси Швейсария Миллий банки омборларида қўлланиладиган даражага мос бўлиши керак", – деган эди.
Дастлабки омборларни 2028-йилда битказиш кутилмоқда. Тоғ массивида жами 25 тагача хона яратиш режалаштирилган. Улардан биридан 99 йил муддатга фойдаланиш ҳуқуқи қиймати 1 миллион еврога етиши мумкин. Бу омборлар мулкини узоқ муддат сақлашга эҳтиёж сезадиган миллиардерлар учун мўлжалланган.
Ерости мажмуасига кириш бир неча босқичли назорат орқали амалга оширилади. Гассернинг сўзларига кўра, одам аввал шлюздан ўтиши керак бўлади, шунингдек, қўшимча текширувлар ҳам кўзда тутилган. Компаниянинг билдиришича, омборларда деярли ҳар қандай қимматбаҳо буюмларни сақлаш мумкин бўлади. Чекловлар фақат гиёҳванд моддалар ва портловчи моддаларга тааллуқли.