Акса Ўзбекистоннинг яна учта вилояти электр тармоқларини бошқарувга олишни режалаштирмоқда
Туркиянинг Акса Энержи компанияси бир ҳафта ичида Тошкент, Сирдарё ва Жиззах вилоятлари электр тармоқлари бўйича келишувларни имзолашни режалаштирмоқда. У йўқотишларни камайтириш учун тармоқларга сармоя киритмоқчи. Аввалроқ у Самарқанд электр тармоқлари тендерида ғолиб чиққанди.
Акса Ўзбекистоннинг яна учта вилояти электр тармоқларини бошқарувга олишни режалаштирмоқда
Туркиянинг Акса Энержи компанияси бир ҳафта ичида Тошкент, Сирдарё ва Жиззах вилоятларининг тақсимловчи электр тармоқлари бўйича келишувларни имзолашни режалаштирмоқда. Бу ҳақда компания директорлар кенгаши раиси Жамил Казанжи 16-октабр куни президент Шавкат Мирзиёев билан учрашувдан кейин “Ўзбекистон 24” телеканалига берган интервюсида айтиб ўтди.
Унинг таъкидлашича, компания йўқотишларни қисқартириш, таннархни тушириш ва энергиядан фойдаланиш самарадорлигини ошириш мақсадида тақсимловчи тармоқларга сармоя киритмоқчи.
“Йиғилишда Тошкент, Сирдарё ва Жиззах вилоятлари бўйича келишувларимизни ҳам муҳокама қилдик. Уларни бир ҳафта ичида имзолашни режалаштиряпмиз. Шу тариқа Самарқандда бошланган фаолиятимизни ушбу ҳудудларда ҳам кенгайтирамиз”, — деди Казанжи.
Унинг қайд этишича, президент билан учрашувда компания олдида турган вазифалар аниқлаштирилган.
“Бизга аҳоли манфаатларига хизмат қиладиган лойиҳалар тақдим этилди. Энди уларни тез фурсатда ўрганиб, ўз таклифларимизни билдирамиз. Ушбу ташрифимиз аниқ келишувлар билан якунланишини истаймиз”, — деди Акса директорлар кенгаши раҳбари.
Казанжининг сўзларига кўра, ҳозиргача Акса Энержи Ўзбекистонга 750 млн доллар сармоя киритиб, тўртта электр стансиясини қурган.
“Келгусида электр энергияси ва газни тақсимлаш соҳасида ҳам фаолиятимизни давом эттирамиз”, — деди у.
Интервюда учта вилоят бўйича режалаштирилаётган келишувлар параметрлари ва компаниянинг тақсимловчи тармоқлар ишида иштирок этиш шакли очиқланмаган.
Аввалроқ Акса Самарқанд вилоятининг тақсимловчи электр тармоқларини бошқариш бўйича халқаро тендерда ғолиб чиққан эди. Вилоят ҳокимлиги 9-октабр куни хабар берганидек, 30 йиллик келишув доирасида инвестор минтақа инфратузилмасига 1 млрд доллар йўналтиришни режалаштирмоқда (дастлабки 12 йил ичида 357 млн доллар тўғридан-тўғри инвестиция жалб қилиши керак). Лойиҳа паст кучланишли тармоқларни лойиҳалаш, молиялаштириш, қуриш, эксплуатация қилиш ва уларга техник хизмат кўрсатишни назарда тутади.
Ҳокимлик маълумотларига кўра, Туркия томони танқидий участкалар аудитини якунлаб, 440 та лойиҳани ишлаб чиққан. Вилоятда 1000 та трансформаторни янгилаш, эскирган таянч устунлар ва электр узатиш тармоқларини алмаштириш режалаштирилмоқда. Шунингдек, мобил генераторлар ва махсус техника харид қилиш масаласи кўриб чиқилмоқда.
Акса Ўзбекистонда электр энергияси ишлаб чиқаришда ҳам иштирок этмоқда. Компания Тошкент ва Бухоро вилоятларида умумий қуввати 740 МВт бўлган электр стансиялари қуриш лойиҳаларини амалга оширди. 2024-йил декабр ойида Қашқадарё вилоятининг Нишон туманида 400 МВт қувватга эга яна бир стансияни ишга тушириш маросими бўлиб ўтган эди.