Акбар Жўраев рекордларни янгилаб, Осиё ўйинлари чемпиони бўлди
У даст кўтаришда ўзига тегишли бўлиб турган рекордни янгилади, шунингдек, силтаб кўтаришда ва умумий натижаси билан Осиё ўйинлари рекордларини ўрнатди.
Акбар Жўраев рекордларни янгилаб, Осиё ўйинлари чемпионига айланди
Оғир атлетика бўйича Ўзбекистон терма жамоаси вакили Акбар Жўраев (-110 кг) кутилганидек Осиё ўйинлари ғолибига айланди.
Даст кўтаришда у 197 кг натижа билан жаҳон рекордини янгилади. Бу йўналишдаги рекорд аввал унинг ўзига тегишли эди: у 2025-йил октабрида Норвегияда ўтган жаҳон чемпионатида даст кўтаришда 196 кг, умумий ҳисобда эса 428 кг билан иккита рекорд ўрнатган эди.
Кейин силтаб кўтаришда у илк уринишдаёқ 226 кг ни қайд этди (Осиё ўйинлари рекорди) ва қолган уринишларга эҳтиёж қолмади. Унинг рақиблари эса учта уриниш давомида ҳам 222 кг дан ошира олишмади.
Натижада Жўраев икки курашда 423 кг билан якунлади ва бу ҳам Осиё ўйинлари рекорди бўлди.
Маълумот учун, Акбар Жўраев Олимпиада чемпиони, икки карра Осиё чемпиони ва уч карра жаҳон чемпиони ҳисобланади. Шу билан бирга, бу унинг илк Осиё ўйинлари олтини бўлди — 2022-йилда Ҳангчжоуда ўтган мусобақада у кумуш медал билан кифояланган эди.
Унинг олтин медали Ўзбекистон делегацияси учун 13-олтин бўлди. Ҳозирда Ўзбекистон 13 та олтин, 17 та кумуш ва 13 та бронза, жами 43 та медал билан умумий рейтингда тўртинчи ўринда бормоқда.