Аичи-Нагоя-2026: Ўзбекистон терма жамоаси таркиби эълон қилинди
Ўзбекистон оғир атлетика федерацияси Аичи-Нагоя-2026 Осиё ўйинлари учун терма жамоа таркибини эълон қилди. Жамоадан олти нафар спортчи жой олди.
Аичи-Нагоя-2026: Ўзбекистон терма жамоаси таркиби эълон қилинди
Ўзбекистон оғир атлетика федерацияси XX ёзги Осиё ўйинлари Аичи-Нагоя-2026 учун миллий терма жамоа таркибини маълум қилди. Ушбу мусобақаларда олти нафар ўзбекистонлик спортчи иштирок этади.
Турнирнинг эркаклар ўртасидаги баҳсларида Ўзбекистон шарафини беш нафар оғир атлетикачи ҳимоя қилади. 65 кг гача бўлган вазн тоифасида Адҳамжон Эргашев, 75 кг гача вазнда эса Диёрбек Рўзметов чиқиш қилади.
85 кг гача бўлган вазн тоифасида Ҳасанбой Бердиев, 95 кг гача вазнда Муҳаммадқодир Тоштемиров рўйхатга олинган. 110 кг гача бўлган вазнда эса олимпия чемпиони Акбар Жўраев супачага чиқади.
Аёллар ўртасидаги турнирда Ўзбекистон номидан Нигора Абдуллаева иштирок этади, у 53 кг гача бўлган вазн тоифасида ўз имкониятини синаб кўради.
Шу тариқа, оғир атлетика бўйича Осиё ўйинларида иштирок этувчи миллий терма жамоа таркибидан беш нафар эркак ва бир нафар аёл спортчи жой олди.
XX ёзги Осиё ўйинлари Аичи-Нагоя 2026 йилнинг 19 сентябридан 4 октябрига қадар Японияда бўлиб ўтади.