Аҳолидан сўрашмади
Ўзбекистонда пенсия тизимини ислоҳ қилишга халқаро консультантларни жалб этиш таклиф қилинмоқда. Бунинг учун Пенсия жамғармаси ҳузурида алоҳида лойиҳа офисини ташкил этиш режалаштирилган бўлиб, у жамғариб бориладиган пенсияларни ривожлантириш ва тизимнинг молиявий барқарорлиги билан шуғулланади.
Асосий таклифлардан бири — 2027 йилдан бошлаб жамғариб бориладиган пенсия тизимини «Халқ банки»дан Пенсия жамғармаси тасарруфига ўтказишдир. Шахсий ҳисобварақлардаги маблағлар ҳисоби ва ҳисоботларини 2027 йил охиригача босқичма-босқич унинг ахборот тизимига ўтказиш режалаштирилмоқда. Жамғарма учун яна 31 та штат бирлигини ажратиш ҳам таклиф этилмоқда.
Лойиҳада шахсий жамғармалар учун янги рағбатлар ҳам кўзда тутилган. Агар фуқаро пенсия ҳисобварағига иш ҳақининг 5 фоизини ихтиёрий равишда ўтказса, давлат киритилган сумманинг 50 фоизигача миқдорда маблағ қўшиб бериши мумкин бўлади.
Жамғармаларнинг ўзини ва уларни инвестиция қилишдан олинган даромадларни фуқароларнинг мерос қилиб қолдириш ҳуқуқига эга шахсий мулки деб тан олиш таклиф қилинмоқда. Ҳозирча гап ҳужжат лойиҳаси ҳақида бормоқда, якуний қарор қабул қилингани йўқ.