“Афғонистон қўшни давлатлар учун таҳдид солмайди” — Забиҳуллоҳ Мужоҳид

“Афғонистон қўшни мамлакатлар учун хавф туғдирмайди”, — дея баёнот берди Забиҳуллоҳ Мужоҳид.

Пажҳвок нашрининг хабар беришича, Афғонистон муваққат ҳукумати вакили Забиҳуллоҳ Мужоҳид Афғонистон қўшни давлатлар учун ҳеч қандай таҳдид солмаслигини ва минтақадаги хавотирларнинг аксарияти асоссиз эканлигини маълум қилди.

Мужоҳид Коллектив хавфсизлик шартномаси ташкилоти (КХШТ) бош котиби Таалатбек Масадиковнинг Тожикистон–Афғонистон чегарасини мустаҳкамлаш мақсадида қурол-яроғ ва техника етказиб бериш бўйича келишувга эришилгани ҳақидаги баёнотига жавобан шундай деди.

Унинг сўзларига кўра, Афғонистон хавфсизлик кучлари мамлакат чегараларини тўлиқ назорат қилмоқда ва бутун мамлакат бўйлаб юқори даражадаги хавфсизликни таъминламоқда.

“Биз доим эшитиб келаётган бу хавотирлар, бизнингча, кўп жиҳатдан асоссиз. Эҳтимол, Афғонистонга душманона муносабатда бўлган айрим давлатларнинг разведка тузилмалари Афғонистон ва унинг қўшнилари ўртасида кескинлик юзага келтириш мақсадида ташкилотга ёлғон ва ишончсиз маълумотлар етказаётгандир”, деди Мужоҳид.

Кобул вакили манфаатдор давлатлар ва ташкилотлар ўз хавотирларини Афғонистон ҳукуматига бевосита етказиши мумкинлигини таъкидлади. Унинг айтишича, агар ҳақиқий таҳдид юзага келадиган бўлса, Афғонистон ҳукумати бунга жиддий муносабатда бўлади.

Аввалроқ, КХШТ бош котиби Таалатбек Масадиков “ТАСС” агентлигига берган интервюсида Тожикистон чегарасини мустаҳкамлаш учун зарур бўлган қурол-яроғ ва техника рўйхати келишиб олинганини ва дастлабки етказиб беришлар шу йилнинг кузида бошланиши кутилаётганини айтган эди.

“Давлатлар Тожикистонга етказиб бериладиган ўлимга олиб келувчи ва нолетал воситалар рўйхатини келишиб олди. Ўйлайманки, шу йил кузида дастлабки етказиб беришлар бошланади”, деган Масадиков.

У Тожикистон–Афғонистон чегараси хавфсизлигини таъминлашни нафақат Тожикистон, балки КХШТнинг барча аъзолари учун ўта муҳим масала деб атаган.

Тожикистон Наркотик моддаларни назорат қилиш агентлиги директори Зафар Самад 2025-йилнинг биринчи ярмида Тожикистон–Афғонистон чегарасида Тожикистон хавфсизлик кучлари ва афғон наркодилерлари ўртасида 10 та қуролли тўқнашув қайд этилганини таъкидлаган эди. Бу воқеалар асосан Афғонистоннинг Бадахшон вилояти билан чегара ҳудудларида содир бўлган.