АББ 7–10 кундан кейин Давр Банкнинг асосий акционерига айланади
Озарбайжоннинг ABB Bank банки Ўзбекистондаги Davr Bank’ни сотиб олиш бўйича битимни якунламоқда ва 2026 йилнинг октябрь ойидаёқ ABB Davr брендини ишга туширишни режалаштирмоқда.
ABB 7–10 кундан кейин Davr Bank’нинг асосий акционерига айланади
Озарбайжоннинг ABB Bank’и яқин 7–10 кун ичида Davr Bank акцияларига бўлган ҳуқуқларнинг юридик топширилишини якунлайди ва унинг асосий акционерига айланади, янги ABB Davr бренди остида иш бошлаши эса тахминан 2026 йилнинг октябрь ойида кутилмоқда. Бу ҳақда банк сайтида жойлаштирилган интервьюда ABB Бошқаруви раиси Аббас Ибрагимов маълум қилди.
Ибрагимовнинг сўзларига кўра, ABB Davr лойиҳасига расмий старт 23 август куни Озарбайжон ва Ўзбекистон президентлари Илҳом Алиев ва Шавкат Мирзиёев иштирокида берилган эди. Ўша пайтга келиб томонлар барча зарур рухсатномаларни олиб бўлган ва акцияларни олди-сотди шартномасини имзолаган эдилар. Рўйхатдан ўтиш тартиб-таомиллари якунланиб, акциядорлар реестрига ўзгартиришлар киритилгандан сўнг, банк ABB назоратига ўтади.
Ребрендинг босқичма-босқич амалга оширилади: аввал ўзгаришлар корпоратив коммуникациялар ва рақамли каналларга, кейин эса филиаллар, банкоматлар ва карталарга дахл қилади. Ибрагимов лойиҳанинг вазифаси фақат номни ўзгартириш билан чекланиб қолмаслигини — банк Ўзбекистонга ABB технологиялари, хизмат кўрсатиш стандартлари ва институционал тажрибасини маҳаллий бозорга мослаштирган ҳолда олиб кириш ниятида эканлигини аниқлаштирди.
Лойиҳа асосига айланган Davr Bank ҳозирда 2 миллиондан ортиқ мижозга хизмат кўрсатади, 43 та филиал ва хизмат кўрсатиш марказлари тармоғига ҳамда 1800 дан ортиқ ходимлар штатига эга. Банк активлари ҳажми 2 миллиард манатдан ошади.
ABB раҳбарининг сўзларига кўра, Ўзбекистон бозорига чиқиш учун платформа танлашда компания банкнинг ривожланиш динамикаси, унинг халқаро алоқалари ва мижозлар сегментларига эътибор қаратган.
ABB Davr’ни жисмоний шахслар, кичик ва ўрта бизнес, шунингдек, корпоратив мижозлар учун рақамли банкинг, тўловлар ва ҳужжатли операцияларга урғу берган ҳолда универсал банк сифатида ривожлантириш режалаштирилган. Ибрагимов банк, шунингдек, ABB томонидан Озарбайжонда муваффақиятли амалга оширилган Beyond Banking моделини Ўзбекистон бозорига мослаштириш ниятида эканлигини таъкидлади.
Лойиҳанинг икки томонлама иқтисодий алоқалар учун аҳамияти ҳақида гапирар экан, Ибрагимов Ўзбекистонда Озарбайжон капитали иштирокидаги 470 дан ортиқ, Озарбайжонда эса Ўзбекистон капитали иштирокидаги 130 дан ортиқ корхона рўйхатга олинганини эслатиб ўтди. Унинг сўзларига кўра, ABB Davr ҳисоб-китоблар, савдони молиялаштириш ва ҳужжатли операциялар ҳисобига ушбу бизнес-экотизим учун молиявий кўприкка айланиши мумкин.
ABB гуруҳи учун ушбу битим 2026–2028 йилларга мўлжалланган географик кенгайиш стратегияси доирасидаги биринчи қадам бўлади. У якунлангач, гуруҳнинг мижозлар базаси тахминан 5,5 миллион кишигача, потенциал аудиторияси эса 10 миллиондан 50 миллионгача ошади.