75 ёшли миллиардер Иля Трабер «Лефортово»дан озод этилди
Россияда ОАВ томонидан «Путиннинг дўсти» деб аталадиган 75 ёшли миллиардер Иля Трабер Москвадаги «Лефортово» тергов ҳибсхонасидан озод қилинди. Қотилликка буюртма беришда айбланаётган тадбиркорни ҳибсдан чиқариш қарори унинг соғлиғи кескин ёмонлашгани билан изоҳланган. Шу билан бирга, унга қўйилган айбловлар бекор қилинмаган.
75 ёшли миллиардер Иля Трабер «Лефортово» қамоқхонасидан озод этилди.
Трабер 27-август куни кечқурун «Лефортово»дан чиқиб, ҳибсга олинишидан олдин яшаган Санкт-Петербургга йўл олди. Бу ҳақда Петербургнинг «Фонтанка» нашри хабар берди, ТАСС агентлиги ҳам ўз манбасига таяниб бу маълумотни тасдиқлади.
«Фонтанка»нинг хабар беришича, Траберга нисбатан жиноят ишини олиб бораётган терговчи унинг соғлиғи кескин ёмонлашгани сабабли уни ҳибсдан озод қилиш тўғрисида қарор қабул қилган.
Нашрнинг маълум қилишича, Трабер тахминан соат 19:00 да «Лефортово»ни тарк этган. Журналистлар унинг озод қилиниши жиноят иши тугатилганини англатмаслигини таъкидлаганлар.
**Трабер 17-июндан бери ҳибсда эди**
Москва Басман суди 17-июн куни Иля Траберни икки ойга ҳибсга олган, 13-августда эса унинг ҳибс муддати яна икки ойга узайтирилган эди.
Тадбиркорга Россия Жиноят кодексининг уюшган гуруҳ томонидан ғаразли мақсадларда қотиллик содир этиш ҳамда уюшган гуруҳ таркибида қурол-яроғнинг ноқонуний муомаласига оид моддалари бўйича айблов қўйилган.
Жиноят иши 2020-йил кузида Ленинград вилояти Виборг раёнидаги муниципал тузилма депутати Александр Петровнинг ўлдирилиши билан боғлиқ.
Тергов маълумотларига кўра, Петров Виборг яқинидаги коттежи ҳудудида бўлган вақтда дарёнинг қарама-қарши қирғоғидан ўқ узилиб, ўлдирилган. Ушбу иш доирасида жами тўрт нафар шахс қўлга олинган.
**ОАВ Траберни жиноий доиралар билан боғлайди**
Иля Трабернинг бизнес манфаатлари Санкт-Петербургдаги портлар билан боғлиқ. У 1990-йилларда шаҳардаги йирик антиквариат савдогарларидан бири бўлган, шунингдек, «Петербург нефт терминали» компаниясини назорат қилган.
Ўша йилларда Трабер Санкт-Петербург мериясида ишлаган Владимир Путин билан таниш бўлгани ҳам қайд этилади. Шу муносабат билан айрим ОАВ уни «Путиннинг дўсти» деб атайди.
Россия ва хорижий ОАВ Траберни жиноий доиралар билан ҳам боғлаб келади. 2016-йилда Испания уни «рус мафияси»га оид иш доирасида қидирувга берган.
2018-йилда эса Трабер уни «Тамбов жиноий гуруҳи» аъзоси деб атагани учун «Дожд» телеканали устидан судга мурожаат қилган. Телеканал сюжети Трабернинг Россия шимоли-ғарбидаги портлардаги бизнеси ва унинг тадбиркор Николай Шамалов билан ҳамкорлиги ҳақида эди.