5 сентябр куни Тошкент йўлларида 1,47 млн машина ҳаракатланди

5 сентябр куни Тошкент йўлларида 1,47 млн машина ҳаракатланди

5 сентябр куни бир сутка мобайнида Тошкент йўлларида 1 469 948 та транспорт воситаси ҳаракат қилган. Пойтахт Йўл ҳаракатини ташкил этиш маркази берган маълумотга кўра, бу рақам олдинги кунга қараганда 32 109 та машинага кам. 4 сентябр куни 1 502 057 та транспорт воситаси қайд этилган. Бу ҳақда Тошкент шаҳар Йўл ҳаракатини ташкил этиш маркази хабар берди.

Ўша куни пойтахт автобуслари 170 та йўналишда 19 778 та қатновни амалга оширди. Жамоат транспортидан 1 098 438 нафар йўловчи фойдаланган.

Тошкент метрополитени ҳам бир суткада 745 951 нафар йўловчига хизмат кўрсатди.

5 сентябр куни пойтахт йўлларидаги тирбандлик даражаси 4–5 балл оралиғида бўлди. Йўллардаги ҳолатга шаҳарнинг еттита участкасида олиб борилган коммунал ишлар ҳам қисман таъсир кўрсатди.

Хусусан, Боғишамол, Ал-Хоразмий, Шоқирариқ, П. Маҳмуд ва Самарқанд Дарвоза кўчаларида, Вестминстер тор кўчасида, шунингдек, Фарҳод ва Лутфий кўчалари кесишмасида ишлар олиб борилди. Шу сабабли йўл қисмларининг айримларидан фойдаланиш ва транспорт оқими ҳаракати қисман чекланди.

Ҳайдовчиларга сафарларни режалаштиришда йўл ишларини ҳисобга олиш ва зарурат туғилганда муқобил йўналишларни танлаш тавсия этилди.

Шу билан бирга, ЙҲХХ йўл ҳаракати қоидаларига риоя этилишини назорат қилишни давом эттирди. 5 сентябр куни аниқланган қоидабузарликлар орасида автомобилларни пиёдалар йўлакларида ҳаракатлантиришнинг саккизта ҳолати, тўхтаб туриш қоидаларининг 18 та бузилиши ва тўхташ қоидаларининг 17 та бузилиши қайд этилди.

Бундан ташқари, жамоат транспорти учун мўлжалланган “А” йўлагида ҳаракатланиш қоидаларининг бузилиши билан боғлиқ тўртта ҳолат аниқланди.

Назорат тадбирлари, жумладан, жамоат транспортига устуворлик бериш, пиёдалар хавфсизлигини ошириш ва ҳаракат иштирокчиларининг белгиланган қоидаларга риоя этишини таъминлаш мақсадида ўтказилмоқда.

Ҳайдовчиларга автомобилларни пиёдалар ўтиш жойларида ва улар олдида қолдирмаслик, белгиланган ўтиш жойларида пиёдаларга йўл бериш ҳамда автобус бекатлари ҳудудини эгалламаслик зарурлиги эслатилмоқда. Шунингдек, автомобилистлар “А” махсус йўлакларида ҳаракатланиш талабларига риоя қилиши, автобуслар бекатларга яқинлашаётганда ва улардан чиқиб кетаётганда ҳаракатига халақит бермаслиги лозим.

Пойтахтдаги транспорт вазияти Ситуацион марказда реал вақт режимида назорат қилиб борилмоқда. Мониторинг транспорт юкламасидаги ўзгаришларни кузатиш ва шаҳар кўчаларидаги ҳаракат ҳолатини тезкор назорат қилиш имконини беради.