2050 йилга бориб Ўзбекистонда ёшлар сони 15 миллион кишига етади
2050 йилга бориб Ўзбекистонда ёшлар сони 15 млн кишига етади
«Оила ва гендер» илмий-тадқиқот институти узоқ муддатли демографик прогноз тақдим этди, унга кўра Ўзбекистонда 14 ёшдан 30 ёшгача бўлган аҳоли сонининг сезиларли даражада ўсиши кутилмоқда.
1996–2012 йиллардаги паст туғилиш кўрсаткичи билан боғлиқ пасайишдан сўнг, ёшлар сони яна тез суръатлар билан кўпая бошлайди.
Ёшлар (14–30 ёш) сони ўсишининг динамикаси:
2021 йил: 9,68 млн киши
2025 йил: 9,62 млн киши (пасайиш)
2030 йил: 10,41 млн киши
2040 йил: 13,27 млн киши
2050 йил: 14,92 млн киши
Экспертларнинг таъкидлашича, 2026 йилдан 2033 йилгача бўлган даврда ёшлар сони ўсиб боради, бироқ уларнинг умумий аҳоли сонидаги улуши камайишда давом этади. Ёшлар улушининг умумий аҳолига нисбатан кўпайиши фақат 2034 йилдан бошлаб кутилмоқда.
Демографик ўзгаришлар янги оилалар сонининг кўпайишига олиб келади. Институт таҳлилчиларининг баҳолашича, фуқароларнинг никоҳ ёшига етиши билан ҳамёнбоп уй-жойларга, қўллаб-қувватлаш дастурларига, иш ўринларига, шунингдек, болалар боғчалари, тиббиёт муассасалари ва ижтимоий ҳимоя хизматларига бўлган эҳтиёж кескин ортади.