2030 йилдан бошлаб Ўзбекистонда тиббиёт ходимлари давлат рўйхатидан ўтишга мажбур бўладилар
Ўзбекистонда тиббиёт ходимларини касбга йўллаш тартибини ўзгартириш кутилмоқда. Дипломдан ташқари, билимларни мустақил баҳолашдан ўтиш ва давлат рўйхатидан ўтиш талаб этилади. 2027 йилдан 2030 йилгача тизим ихтиёрий, 2030 йилдан бошлаб эса мажбурий бўлади.
2030 йилдан бошлаб Ўзбекистонда тиббиёт ходимлари давлат рўйхатидан ўтишга мажбур бўладилар
Ўзбекистонда тиббиёт ва фармацевтика ходимларини давлат рўйхатидан ўтказишни жорий этиш режалаштирилмоқда. Бу ҳақда 4 сентябрь куни Президент ҳузурида бўлиб ўтган тақдимотда сўз борди.
2027 йилдан 2030 йилгача рўйхатдан ўтишни ихтиёрий, 2030 йилдан бошлаб эса мажбурий қилиш таклиф этилмоқда. Келгусида рўйхатдан ўтмаган мутахассислар тиббий ёки фармацевтик фаолият билан шуғуллана олмайдилар.
Бунинг учун тиббиёт ва фармацевтика соҳаси ходимларининг ягона электрон реестрини шакллантириш ва уни 16 та ахборот базаси билан боғлаш режалаштирилган. Реестрда мутахассисларнинг маълумоти, малакаси ва касбий фаолияти тўғрисидаги маълумотлар жамланади.
Тиббиёт ва фармацевтика ходимларининг малакасини баҳолаш маркази директори Санжар Шариповнинг маълум қилишича, гап тахминан 600 минг нафар мутахассис ҳақида бормоқда. «Уларнинг ягона реестрини яратиш ҳамда унинг очиқлиги ва шаффофлигини таъминлаш кўзда тутилмоқда», — деди у.
Рўйхатдан ўтиш билим ва касбий тайёргарликни мустақил баҳолаш билан боғлиқ бўлади. Имтиҳонларни бир неча босқичда — ўқиш даврида, асосий дастур якунланганидан кейин ва резидентурадан сўнг ўтказиш режалаштирилмоқда.
Соғлиқни сақлаш вазири ўринбосари Адҳам Худайқулов дипломнинг ўзи энди мустақил клиник ишга автоматик равишда рухсат беришни англатмаслигини таъкидлади.
«Мустақил баҳолаш тизими пайдо бўлади ва шифокор бўлиб ишлаш фақат рўйхатдан ўтгандан кейингина мумкин бўлади», — деди у.
Унинг сўзларига кўра, биринчи мустақил баҳолашни ўқиш жараёнидаёқ, кейингисини — битирувчига шифокор бўлиб ишлашга рухсат беришдан олдин, резидентурадан кейин эса мутахассис тор ихтисослик бўйича ишлаш учун яна бир баҳолашдан ўтиши керак бўлади.
Тошкент давлат тиббиёт университети ректори Шуҳрат Боймуродов тизим уч босқичли бўлишига аниқлик киритди.
«Иккинчи-учинчи курслар якунланганидан кейин талабалар фундаментал фанлардан имтиҳон топширадилар. Битирув курси тамомлангандан сўнг иккинчи босқич (мутахассислик бўйича — таҳр.), резидентура якунланганидан кейин эса учинчи босқич кўзда тутилган», — деди у.
Баҳолаш учун ягона тестлар ва топшириқлар банки, шунингдек, симуляцион базалар яратиш режалаштирилган. Имтиҳондан ўта олмаганларга қайта топшириш имконияти берилади.
Мажбурий рўйхатдан ўтиш жорий этилгунга қадар тизимга ихтиёрий равишда қўшиладиган мутахассислар учун молиявий рағбатлар кўзда тутилган.
Имтиҳонни муваффақиятли топширган ва давлат реестрига киритилган олий маълумотли шифокорлар ва фармацевтларга меҳнатга ҳақ тўлашнинг энг кам миқдорининг (МҲЭКМ) 5 бараваригача (6,8 млн сўм) устама тўлаш таклиф этилмоқда. Ўрта тиббиёт ва фармацевтика ходимлари учун — МҲЭКМнинг 2,5 бараваригача (3,4 млн сўм).
Узлуксиз касбий таълим натижалари ҳам рўйхатдан ўтиш ва малакани тасдиқлашда ҳисобга олинади.
Санжар Шариповнинг сўзларига кўра, янги тизим тиббий ёрдам сифати ва хавфсизлигини назорат қилишнинг қўшимча механизмига айланиши керак.
«Тиббиёт ва фармацевтика ходимларини халқаро стандартларга мувофиқ давлат рўйхатидан ўтказиш, шунингдек, шаффоф мезонлар асосида уларнинг касбий малакасини мустақил баҳолаш тизимини жорий этиш кўзда тутилмоқда», — деди у.
Давлат рўйхатидан ўтказиш ва малакани баҳолашни ташкил этиш учун алоҳида марказ ташкил этиш режалаштирилган.
Президент янги қоидаларни босқичма-босқич жорий этиш ҳамда кадрлар тайёрлаш, мустақил баҳолаш, давлат рўйхатидан ўтказиш ва малакани доимий оширишни ягона тизимга бирлаштириш бўйича топшириқ берди.
Алоҳида равишда, соғлиқни сақлаш вазири Элдор Адилов тақдимотда Президент 2026 йил якунига қадар тиббий суғурта тизимини бутун мамлакат бўйлаб кенгайтириш, харид қилинадиган дори-дармонлар ва сарфлаш материалларининг беморларга етиб боришини таъминлаш ҳамда соғлиқни сақлаш тизимида коррупциянинг олдини олиш бўйича ишларни кучайтиришни топширганини маълум қилди. У, шунингдек, хорижда ишлаётган ватандош тиббиёт мутахассисларини Ўзбекистонга жалб қилиш учун рағбатлантириш чораларини ишлаб чиқишни топширди.
Ўзбекистонда шифокорларни тайёрлаш тизимини ҳам ўзгартириш режалаштирилмоқда: 2027/2028 ўқув йилидан бошлаб «Даволаш иши» йўналишини олти йиллик «Умумий тиббиёт» дастурига алмаштириш таклиф этилмоқда. Ўқиш 5+1 модели бўйича ташкил этилади — беш йил тайёргарлик ва бир тўлиқ йил амалиёт.