2027–2028 йилларда болалар ва аёллар аҳволи мониторинги ўтказилади
Миллий даражада болалар ва аёлларнинг аҳволини баҳолаш учун кўп индикаторли кластер кузатуви режалаштирилган. Вазирлар Маҳкамасининг 2026 йил 9 октябрдаги 556-сон қарорига мувофиқ, уй хўжаликлари ўртасида сўровномалар БМТнинг Болалар жамғармаси (ЮНИСЕФ) билан ҳамкорликда ўтказилади, тадқиқот натижалари эса 2028 йилнинг июль ойида эълон қилинади.
2027–2028 йилларда болалар ва аёллар аҳволи мониторинги ўтказилади
Статистикани ривожлантириш бўйича Миллий стратегия – 2030 ижроси юзасидан Вазирлар Маҳкамасининг 09.10.2026 йилдаги 556-сон «2027–2028 йилларда Ўзбекистон Республикасида кўп индикаторли кластер мониторингини ўтказиш тўғрисида»ги қарори қабул қилинди.
Кузатувни ташкил этишни Миллий статистика қўмитаси ва ЮНИСЕФ таъминлайди. 2026 йил октябридан 2027 йил июнигача давом этадиган тайёргарлик босқичида хонадонлар танланмасини аниқлаш, анкеталарни ишлаб чиқиш ва тестдан ўтказиш, бюджетни тайёрлаш ҳамда интервьюерларни ўқитиш режалаштирилган.
Кузатувнинг дала босқичи 2027 йил ноябрига мўлжалланган. Сўровлар планшетлардан фойдаланган ҳолда шахсий интервью усулида ўтказилади. Олинган маълумотларни йиғиш ва таҳлил қилишни 2028 йил мартигача, миллий ҳисоботни тайёрлашни – июнгача, натижаларни нашр этишни эса 2028 йил июлигача якунлаш режалаштирилмоқда.
Ишларни мувофиқлаштириш учун Миллий идоралараро мувофиқлаштирувчи кенгаш тузилиши назарда тутилган. У кузатув режаси ва бюджетини тасдиқлаш, анкеталарни келишиш, ишлар сифатини назорат қилиш ҳамда якуний ҳисоботни кўриб чиқиш учун жавоб беради.
Мониторингни молиялаштириш Давлат бюджети, халқаро ва донор ташкилотлар маблағлари, шунингдек бошқа манбалар ҳисобидан амалга оширилади. Вазирлик ва идораларга қўшимча молиялаштиришни ва зарур ҳолларда халқаро экспертларни жалб этиш бўйича чоралар кўриш топширилди.
Кузатувни ўтказишда шахсга доир маълумотларни ҳимоя қилиш ва ахборотнинг конфиденциаллигига эътибор қаратилади. Тадқиқот учун зарур бўлган тиббий маълумотлардан фақат статистик мақсадларда ва белгиланган ҳажмда фойдаланишга рухсат берилади. Мониторингни ўтказишда кўмаклашувчи ташкилотларга хонадонлар сўровига аралашиш тақиқланади.
Кузатув натижалари асосида тегишли вазирлик ва идоралар тегишли йўналишларни ривожлантириш бўйича чора-тадбирлар комплексини ишлаб чиқиши ва Вазирлар Маҳкамасига таклифлар киритиши керак. Ушбу чора-тадбирларни тайёрлашни 2028 йил ноябригача якунлаш режалаштирилмоқда.
Ҳужжат Қонунчилик маълумотлари миллий базасида давлат тилида эълон қилинган ва 14.10.2026 йилдан кучга кирди.