2026 йилнинг саккиз ойи якунларига кўра Ўзбекистон ва Россия ўртасидаги товар айирбошлаш ҳажми 10 фоизга ошди
2026 йилнинг саккиз ойи якунларига кўра, Ўзбекистон ва Россия ўртасидаги товар айирбошлаш ҳажми 10 фоизга ошди. Бу ҳақда 6 октябрь куни Фарғонада бўлиб ўтган Ўзбекистон Республикаси ва Россия Федерацияси ўртасидаги иқтисодий ҳамкорлик бўйича Ҳукуматлараро комиссиянинг 27-йиғилишида маълум қилинди.
Ўзбекистон ва Россия ўртасидаги товар айирбошлаш ҳажми 2026 йилнинг саккиз ойи якунларига кўра 10 фоизга ошди.
Йиғилишда Ўзбекистон делегациясига Бош вазир ўринбосари Жамшид Хўжаев, Россия делегациясига эса РФ Ҳукумати раисининг биринчи ўринбосари Денис Мантуров бошчилик қилди.
Йиғилишни очар экан, Жамшид Хўжаев комиссиянинг аввалги йиғилишидан сўнг Ўзбекистон-Россия ҳамкорлиги кун тартиби сезиларли даражада кенгайганини, Ҳукуматлараро комиссия механизмининг ўзи эса икки давлат раҳбарлари келишувларини амалий рўёбга чиқаришда муҳим рол ўйнашини таъкидлади.
«Вазифамиз — лойиҳаларнинг ўз вақтида бажарилишини таъминлаш ва ҳамкорликдаги ҳаракатларни талаб қиладиган масалалар бўйича қарорларни келишиб олишдир. Иқтисодиётларимиз бир-бирини яхши тўлдиради ва бу савдо шериклигимизнинг асосий устунларидан биридир», — деб қайд этди Хўжаев.
Йиғилиш давомида қўшма лойиҳаларни амалга ошириш масаласи ҳам кўриб чиқилди. 2026 йилда кимё саноати, қишлоқ хўжалиги маҳсулотларини қайта ишлаш ва металлга ишлов бериш соҳаларида умумий қиймати 350 миллион долларлик 17 та қўшма лойиҳани ишга тушириш режалаштирилган.
Энергетика соҳасидаги ҳамкорликка, жумладан, Жиззах вилоятида атом электр станцияси қурилиши, миллий кадрларни тайёрлаш ҳамда ускуналар ва хизматларни маҳаллийлаштириш масалаларига алоҳида эътибор қаратилди.
Бундан ташқари, томонлар туристик алмашинувларнинг ижобий динамикасини қайд этдилар. 2025 йилда Ўзбекистонга қарийб 1 миллион россиялик сайёҳ ташриф буюрган.
Йиғилиш якунлари бўйича Ҳукуматлараро комиссиянинг 27-йиғилиши Баённомаси ҳамда Россия ва Ўзбекистоннинг 2026–2040 йилларга мўлжалланган илмий-технологик ривожланиш стратегияси имзоланди.
Томонлар қўшма лойиҳаларни амалий рўёбга чиқаришни давом эттириш ва Ўзбекистон-Россия стратегик шериклигини янада мустаҳкамлашга тайёр эканликларини тасдиқладилар. 2027 йилда мамлакатлар дипломатик муносабатлар ўрнатилганининг 35 йиллигини нишонлайдилар.