132 йилга кечиккан журнал АҚШ кутубхонасига қайтарилди
Конкорд оммавий кутубхонасининг маълум қилишича, агар жарималарни вақтинчалик музлатиш тартиби амалда бўлмаганида, муддати ўтган китоб учун 12 055 доллар миқдорида жарима ундирилган бўлар эди.
Нью-Гэмпшир кутубхонасидан 132 йил аввал олинган журнал ниҳоят қайтарилди.
Конкорд оммавий кутубхонасининг маълум қилишича, *The Century Illustrated Monthly Magazine* журналининг 1894 йил сентябрь сони ўтган ҳафтада, кутубхона жарималарни музлатиш ҳақида эълон қилганидан кейин қайтарилган.
Журнал 48 220 кунга кечиктирилган бўлиб, бунинг учун 12 055 доллар (8 950 фунт стерлинг) миқдорида жарима ундирилиши керак эди.
Уни қайтариб берган Жон исмли шахснинг айтишича, журнал унинг уйида ўнлаб йиллар давомида «ётиб қолган», аммо у ерга қандай келиб қолганини ўзи ҳам билмайди.
У маҳаллий газетада кутубхона жарималарни музлатгани ҳақидаги хабарни кўргач, журнални қайтариб олиб келишга қарор қилган.
«Жарималарни музлатиш ҳақида эълон қилганимиздан бери кўплаб бахтли чеҳраларни кўрдик», деб ёзди Конкорд оммавий кутубхонаси Facebook саҳифасида.
«Албатта, биз анча вақт олдин олинган китоблар қайтарилишини кутган эдик, лекин XIX аср охирига оид нарсани эмас!»
Конкорд оммавий кутубхонаси 2026 йил 1 сентябрдан бошлаб кечиктирилган жарималар учун бир йиллик амнистия жорий этди ва бундан мақсад «жаримасиз кутубхона» таъсирини баҳолашдир.
«Табиийки, у қайта муомалага чиқарилмайди, лекин балки Конкорд хонасидан жой олишга лойиқдир», дейилади ижтимоий тармоқдаги постда кутубхонанинг маҳаллий тарихга бағишланган бўлими назарда тутилиб.
«Хайриятки, у 48 220 кунлик кечикиш учун 12 055 долларлик жаримани тўлаши шарт эмас».