12 йилдан сўнг оқланган собиқ божхоначи лавозимига қайта тикланишга эришди
12 йилдан сўнг оқланган собиқ божхоначи лавозимига қайта тикланишга эришди
2014 йилда 10 йилу 6 ойга озодликдан маҳрум этилган «Навоий» божхона постининг собиқ инспектори Ҳусан Нигматов оқланиш, етказилган зарарни қоплаш ва ишга қайтишга эришди. Суд бўшатиш тўғрисидаги буйруқни ноқонуний деб топди ва уни аввалги ёки унга тенглаштирилган лавозимга қайта тиклаш мажбуриятини юклади.
Нигматов божхона органларида 2009 йил май ойидан 2013 йил февраль ойигача хизмат қилган. У Тошкент вилояти божхона бошқармаси «Навоий» чегара постида божхона кўриги, юкларни рўйхатдан ўтказиш ва расмийлаштириш гуруҳи инспектори лавозимини эгаллаган.
2014 йил ноябрь ойида вилоят суди уни Жиноят кодексининг божхона қоидаларини бузиш, мансабдорлик жиноятлари ва пора олиш билан боғлиқ бир нечта моддалари бўйича айбдор деб топди. Унга 10 йилу 6 ой муддатга озодликдан маҳрум қилиш жазоси тайинланди. Ҳукм эълон қилингунга қадар, тергов давомида Нигматов эгаллаб турган лавозимидан озод қилинган эди.
У айбсизлигини таъкидлашда давом этди ва адвокати билан бирга Олий судга мурожаат қилди. 2026 йил 15 январда Олий суднинг жиноят ишлари бўйича судлов ҳайъати Нигматовга нисбатан 2014 йил 19 ноябрдаги ҳукм ва 2016 йил 9 августдаги апелляция ажрамини бекор қилди. У Жиноят-процессуал кодексининг 83-моддаси асосида оқланди.
Оқланганидан сўнг Нигматов моддий ва маънавий зарарни қоплашни талаб қилиш ҳуқуқига эга бўлди. Тошкент вилояти судининг ажримига кўра, унга 576,3 миллион сўм тўланмаган иш ҳақи ва илгари давлат даромадига ўтказилган 15,4 миллион сўмни қайтариш белгиланди. Умумий сумма 591,7 миллион сўмни ташкил этди. Бундан ташқари, Учтепа туманлараро фуқаролик ишлари бўйича суди унинг фойдасига маънавий зарар компенсацияси сифатида 350 миллион сўм ундириш ҳақида қарор чиқарди.
Шундан сўнг Нигматов Иқтисодиёт ва молия вазирлиги ҳузуридаги Божхона қўмитасига уни аввалги лавозимига қайта тиклаш илтимоси билан мурожаат қилди. Бироқ 2026 йил февраль ойида унга рад жавоби берилди ва ишга тикланиш учун судга мурожаат қилиш кераклиги тушунтирилди.
Собиқ инспектор Учтепа туманлараро фуқаролик ишлари бўйича судига даъво аризаси билан мурожаат қилди. У Божхона қўмитаси раисининг 2014 йил 16 январдаги буйруғининг уни ишдан бўшатишга оид қисмини ноқонуний деб топиш ва бекор қилишни, уни ишга тиклашни ҳамда мажбурий бекор юрган даврини меҳнат стажига қўшишни сўради.
Суд Жиноят-процессуал ва Меҳнат кодексларининг жиноий таъқиб туфайли ноқонуний ҳукм қилинган ёки лавозимидан четлаштирилган шахсларни ишга тиклашни назарда тутувчи нормаларини инобатга олди. Якунда Нигматовнинг даъвоси қаноатлантирилди.
Суд бўшатиш тўғрисидаги буйруқни ноқонуний деб топди ва Нигматовни инспектор ёки унга тенглаштирилган лавозимга қайта тиклаш ҳақида қарор чиқарди. Мажбурий бекор юрган давр меҳнат стажига қўшилади.
Аввалроқ «Навоий» постида Ўзбекистондан 240 минг долларни ноқонуний олиб чиқиб кетишга бўлган уриниш бартараф этилган эди. Қўшни давлатнинг икки нафар фуқароси божхона назоратидан яшириш ва декларациялашдан қочиш мақсадида валютани скотч билан оёқларига бойлаб олишган.