Зеленский илк бор Сербияга ташриф билан келди
Украина президенти Володимир Зеленский Россия–Украина уруши бошланганидан буён илк марта Сербияга ташриф буюрди. Белградда у Сербия президенти Александр Вучич билан норасмий учрашув ўтказди. Томонлар 8-август куни расмий музокаралар ўтказиб, иқтисодий ҳамкорлик, хавфсизлик ва Европа Иттифоқи билан муносабатларга оид масалаларни муҳокама қилиши режалаштирилган.
Зеленский илк бор Сербияга ташриф буюрди
Украина Президенти Володимир Зеленский 7-август оқшомида Белградда Сербия Президенти Александр Вучич билан кечки овқатда учрашди. Бу 2022-йилда Россиянинг кенг кўламли босқини бошланганидан бери Украина раҳбарининг Сербияга биринчи ташрифи ҳисобланади.
Учрашувдан сўнг Зеленский ижтимоий тармоқда қисқача изоҳ қолдириб, "Сербияда икки томонлама мулоқотни бошладик", деб ёзди. Учрашув мазмуни ёки эришилган натижалар ҳақида қўшимча маълумот берилмади.
Александр Вучич эса ташриф икки мамлакат ўртасидаги муносабатларни янада ривожлантириш ва ўзаро манфаатли соҳаларда ҳамкорликни мустаҳкамлашга хизмат қилишини таъкидлади. Унинг сўзларига кўра, музокараларда иқтисодий алоқаларни кенгайтириш, энергетика соҳасидаги ҳамкорлик, хавфсизлик ва Европа Иттифоқи билан муносабатлар масалалари муҳокама қилинади.
Сербия Президенти матбуот хизматининг маълумотига кўра, давлат раҳбарларининг расмий музокаралари 8-август куни Белграддаги Президент саройида бўлиб ўтади. Учрашув якунида икки президент оммавий ахборот воситалари вакиллари учун қўшма матбуот анжумани ўтказиши режалаштирилган. Шунингдек, Зеленский ташриф давомида Сербия Бош вазири Журо Мацут билан ҳам учрашади.
Сербия Европа мамлакатлари орасида Россия билан энг яқин муносабатларни сақлаб қолаётган давлатлардан бири ҳисобланади. Белград 2022-йилда уруш бошланганидан кейин Москвага қарши санксиялар жорий этмаган ва энергетика соҳасида Россия билан ҳамкорликни давом эттирмоқда. Шу боис Европа Иттифоқи Сербиянинг Россия билан яқин алоқалари мамлакатнинг ЕИга аъзо бўлиш жараёнига салбий таъсир кўрсатаётганини бир неча бор таъкидлаган.
Президент Александр Вучич 2022-йилдан буён камида икки марта Россия Президенти Владимир Путин билан шахсан учрашган. Хусусан, у 2025-йил 9-май куни Москвада бўлиб ўтган Ғалаба парадида иштирок этган эди.
Зеленский ва Вучич эса 2022-йил 24-февралдан кейин уч марта шахсан учрашган. Улар 2023-йилда Кишинёв ва Афинада, 2025-йилда эса Одессада ўтган "Украина – Жануби-Шарқий Европа" саммити доирасида музокаралар ўтказган.
АФП агентлигининг юқори лавозимли украиналик манбасига кўра, Зеленскийнинг Белградга ташрифи Россия учун муҳим сиёсий сигнал сифатида баҳоланмоқда.