АФП: Зеленский биринчи марта Сербияга ташриф буюради
Украина президенти Володимир Зеленский 8-август куни Россиянинг Украинага қарши тўлиқ босқини бошланганидан буён илк бор Сербияга ташриф буюради. АФП агентлиги маълумотига кўра, сафар Украина ва Сербия ўртасидаги муносабатларни мустаҳкамлаш ҳамда Белграднинг Москва билан яқин алоқалари фонида катта сиёсий аҳамиятга эга.
АФП: Зеленский илк бор Сербияга ташриф буюради
Украина Президенти Володимир Зеленский 8-август куни Сербияга расмий ташриф билан боради. Бу унинг 2019-йилда президентлик лавозимига киришганидан ва Россиянинг 2022-йилда Украинага қарши кенг кўламли босқини бошланганидан бери Белградга биринчи сафари бўлади.
АФП агентлигига берган интервюсида юқори лавозимли украиналик амалдорнинг сўзларига кўра, ташрифнинг асосий мақсадларидан бири Сербия билан алоқаларни фаоллаштиришдир. Манбанинг таъкидлашича, Киев Белградни Москва таъсиридан узоқлаштиришга интилмоқда.
Сербия Европада Россияга нисбатан энг дўстона муносабатдаги давлатлардан бири ҳисобланади. Мамлакат Украинадаги уруш бошланганидан кейин ҳам Москвага қарши санксиялар жорий этмаган ва энергетика соҳасида Россия билан яқин ҳамкорликни сақлаб қолган.
Сербия Президенти Александр Вучич 2022-йилдан кейин Россия Президенти Владимир Путин билан камида икки марта шахсан учрашган. Жумладан, у 2025-йил 9-май куни Москвадаги Ғалаба парадида иштирок этган.
Шу билан бирга, Зеленский ва Вучич уруш бошланганидан буён уч марта шахсан мулоқот қилган. Улар 2023-йилда Кишинёв ва Афинада, 2025-йилда эса Одессада ўтказилган «Украина – Жануби-Шарқий Европа» саммити доирасида учрашган.
Сербия расман Европа Иттифоқига аъзо бўлишга интилаётган бўлса-да, Брюссел Белграднинг Россия билан яқин муносабатларини бир неча бор танқид қилган. Мамлакат энергетика соҳасида Россияга қарам бўлиб қолмоқда, шунингдек, уруш бошланганидан кейин ўн минглаб россияликлар учун асосий кўчиб ўтиш йўналишларидан бирига айланган.