Ёнилғи танқислиги фонида Россия экологик стандартларни юмшатди

Россия ҳукумати ёнилғи танқислиги шароитида экологик стандартларни юмшатишга қарор қилди. Эндиликда К2–К4 («Евро-2», «Евро-3» ва «Евро-4») экологик тоифаларига мансуб бензинни ишлаб чиқариш ва сотишга 2027-йил 1-июлгача рухсат берилади. Бу ҳақда Россия Энергетика вазирлиги маълум қилди.

Шу билан бирга, ҳукумат аввалги, 2026-йил охиригача таркибида олтингугурт миқдори юқорироқ бўлган К5 тоифали бензиндан фойдаланишга рухсат берувчи қарорни бекор қилди.

Энергетика вазирлигининг таъкидлашича, автоёнилғи қуйиш шохобчаларида бензиннинг экологик тоифаси харидорлар учун аниқ кўрсатилади. Вазирлик ушбу қарор вақтинчалик эканини ва ёнилғи сифати талаблари билан истеъмолчиларни узлуксиз таъминлаш ўртасидаги мувозанатни сақлаш мақсадида қабул қилинганини билдирди.

Нашр маълумотларига кўра, Россиядаги ёқилғи инқирози Украина қуролли кучларининг нефтни қайта ишлаш заводлари ва ёнилғи-энергетика инфратузилмаси объектларига берган мунтазам зарбалари ортидан кучайган. Хусусан, май ойи охирида Москва ёнилғисининг қарийб 40 фоизини таъминлайдиган «Капотня» нефтни қайта ишлаш заводи қисқа вақт ичида икки марта ҳужумга учраб, 2026-йил охири ёки 2027-йил бошигача ишдан чиққан.

Реутерс агентлиги маълумотларига кўра, 2026-йил июн ойида Россияда бензин ишлаб чиқариш ҳажми ўтган йилнинг шу даврига нисбатан 25 фоизга қисқариб, кунига 85 минг тоннани ташкил этган. Ёзги мавсумда эса мамлакатда кунлик талаб тахминан 110 минг тоннани ташкил этмоқда. Шу сабабли Россиянинг 40 дан ортиқ ҳудудида ёнилғи савдосига расмий чекловлар жорий этилган.

Мутахассисларнинг фикрича, паст экологик стандартли бензин ишлаб чиқаришга рухсат бериш нефт маҳсулотларини чуқур қайта ишламасдан ишлаб чиқариш имкониятини кенгайтиради ва ишлаб чиқариш ҳажмини ойига юз минглаб тоннага ошириши мумкин. Бироқ, бундай ёнилғи замонавий автомобилларнинг катта қисми учун хавф туғдириши мумкинлиги ҳам қайд этилмоқда.