Хитойда 18-қаватдан тушиб кетган қиз омон қолди

Хитойда 20 ёшли қиз йигити билан жанжаллашиб, 18-қаватдаги уйининг балконидан ўзини ташлаганига қарамай, тирик қолди. Бу ҳақда Соутҳ Чина Морнинг Пост нашри хабар берди.

Маълумотларга кўра, қиз 12-июл куни эрталаб соат 4 да балкондан сакраган. Дарахт шохлари унинг тушиш тезлигини секинлаштириб, буталар орасига тушишига сабаб бўлган.

Йигити уни дарҳол касалхонага олиб борган ва даволаниш учун 20 000 юан (3 000 АҚШ доллари) тўлаган. Шифокорлар қизнинг боши, ўпкаси, жигари ва талоғи жароҳатлангани, тос, чаноқ суяги ва иккала оёғи синганини аниқлаган. Қиз иккита жарроҳлик амалиётини бошдан кечирган.

Қиз 10-июл куни йигити билан муносабатларини тугатишга қарор қилиб, Юннанга қайтиш учун поезд чиптасини сотиб олган. 11-июл куни бўлиб ўтган жанжалдан сўнг, йигити унинг шахсий гувоҳномаси ва мобил телефонини олиб қўйган, шунингдек, эшикни қулфлаб қўйган.

Қизнинг ҳикояси унинг оиласи тиббий харажатларни қоплашда молиявий қийинчиликларга дуч келиб, оммавий ахборот воситаларидан ёрдам сўраганида маълум бўлди. Жабрланувчининг онасига 2022-йилда саратон ташхиси қўйилган, отаси эса унинг даволаниши учун жамғармаларини сарфлаб, қарз олган.

Ҳозирда қизнинг тиббий тўловлари 100 минг юандан (қарийб 15 минг АҚШ доллари) ошган, оила шифохонадан 60 минг юан (8 минг 800 доллардан ортиқ) қарздор. Улар онлайн хайрия платформаси орқали 90 минг юан йиғишга муваффақ бўлган. Полиция қизнинг йиқилиши билан боғлиқ ҳолатларни ўрганишни давом эттирмоқда.

"Жияним чиндан ҳам омадли. Кўкаламзорлаштирилган ҳудуддан бир неча фут нарида сементли ер бор, агар у ерга тушса, ҳалок бўлиши аниқ эди", деди қизнинг тоғаси Ли.

Апрел ойида Хитойнинг Далян шаҳрида 11-қават ойнасидан тушиб кетган тўрт ёшли бола ҳам тирик қолганди. Онасининг айтишича, хонадон эшиги ва дераза тўри қулфланган, уйдаги вазият эса камера орқали назорат қилиб турилган. Бироқ бола қандайдир тарзда деразанинг калитини топиб, уни ўзи очишга муваффақ бўлган.