Винисиус “Реал”дан 80 млн евро талаб қилди — инсайдер

Винисиус "Реал"дан 80 миллион евро бонус талаб қилмоқда — инсайдер

Мадриднинг "Реал" клуби етакчи футболчиларидан бири Винисиус Жуниорнинг жамоада қолиши борасидаги вазият ноаниқлигича қолмоқда. Бу ҳолат бразилиялик ҳужумчининг клуб раҳбариятидан янги шартнома учун жуда катта миқдорда маблағ талаб қилаётгани билан боғлиқ.

Журналист Пепе Алвареснинг хабар беришича, футболчи "қаймоқранглилар" билан янги келишув имзолаш учун ўзига хос шарт қўйган: у шартномани узайтиргани учун нақд 80 миллион евро миқдорида бонус тўланишини талаб қилмоқда.

Бундан ташқари, Винисиус ўз имиж ҳуқуқларидан тушадиган даромад улушини ҳам сезиларли даражада оширишни мақсад қилган. Ҳозирда у ўз тасвири ва номидан фойдаланиш ҳуқуқининг 50 фоизига эгалик қилади. Бразилиялик юлдуз эса янги шартномада бу кўрсаткични 80 фоизга кўтаришни истамоқда.

Эслатиб ўтамиз, Винисиус 2018-йилда Бразилиянинг "Фламенго" клубидан 45 миллион евро эвазига "Реал"га ўтган эди. Унинг Мадрид жамоаси билан амалдаги шартномаси 2027-йилнинг 30-июнига қадар мўлжалланган. Якунланган 2025/2026-йилги мавсумда ҳужумчи барча мусобақаларда жами 53 та ўйинда майдонга тушиб, 22 та гол урди ва 14 та голли узатмани амалга оширди. Трансфермаркт портали ҳозирда бразилиялик футболчининг трансфер қийматини 140 миллион еврога баҳоламоқда.

Аввалроқ Винисиус Жуниорга Лондоннинг "Арсенал" клуби жиддий қизиқиш билдираётгани ҳақида хабарлар тарқалган эди.