УЕФА Инфантинонинг истеъфосини талаб қилмоқда
Жаҳон чемпионати ҳуқуқларининг бир қисмини сотиш режаидан воз кечиш ФИФА президентига ёрдам бермади. Европадаги 55 та ассоциация раҳбарлари швейцариялик мулозим кетиши учун овоз бермоқчи.
**УЕФА Инфантинонинг истеъфосини талаб қилмоқда: ФИФА раҳбари атрофидаги зиддиятлар авжида**
"Тҳе Телеграпҳ" нашрининг хабар беришича, УЕФА ва ФИФА ўртасидаги кескинлик тобора кучайиб бормоқда. Европа футбол ассоциациялари иттифоқи Халқаро футбол федерацияси президенти Жанни Инфантинонинг истеъфосини талаб қилмоқда ва унга нисбатан ўз муносабатини очиқчасига билдиришдан тортинмаяпти. Бир кун аввал УЕФА бу борада аниқ баёнот берган эди.
**УЕФА ҳаракатга тайёр**
Британиялик журналистларнинг маълумотига кўра, УЕФА Инфантино ўз хоҳиши билан истеъфога чиқишини истамоқда. Агар 56 ёшли швейцариялик амалдор бу талабни рад эца, европаликлар унинг лавозимидан кетишига эришиш ва унга нисбатан ишончсизлик вотуми эълон қилишни режалаштирмоқда.
Регламентга кўра, овоз беришни бошлаш учун 43 та ассоциациянинг қўллаб-қувватлаши етарли бўлиб, УЕФА бу жараёнда тўлиқ таркибда – 55 та миллий федерация билан иштирок этишга тайёр.
Шу билан бирга, европаликлар бўлажак сайловларда Инфантинога қарши турадиган мухолиф номзод қидирмоқда. Ҳозирча икки номзод кўриб чиқилмоқда: КОНКАКАФ раҳбари Виктор Монталяни ва Осиё футбол конфедерацияси президенти Салмон ибн Иброҳим Ал-Халифа. Учинчи эҳтимолий иштирокчи – "ПСЖ" бош директори Носир Ал-Ҳилайфий – сайловда иштирок этмаслигини аллақачон маълум қилган. Номзодлар рўйхати ноябрга қадар шакллантирилиши керак, сайлов эса 2027 йил баҳорида ўтказилади.
**"ФИФАга ишончни қайтариш энди бошланмоқда"**
Аслида, "Тҳе Телеграпҳ" инсайдларининг аксарияти янгилик эмас. УЕФА анчадан буён Инфантино билан очиқчасига зиддиятда. 1 август куни иттифоқ сайтида шов-шувли пресс-релиз эълон қилинган бўлиб, унда европаликлар функсионернинг "футболни хусусийлаштириш"га уринишини очиқчасига фош этган.
"Инфантино 2016 йилда ФИФАга аъзо ассоциацияларга президентлик сайловларида унга ишонч билдириш ва қўллаб-қувватлашни сўраб мурожаат қилганида, шундай деганди: "Албатта, биз шаффоф бўлишимиз керак. Мен УЕФАдаги сўнгги 15 йиллик фаолиятим давомида ушбу тамойилга амал қилдим. Буни ҳар куни ФИФАда ҳам қилиш керак"... Лекин у ваъдасининг устидан чиқмади. У ўтказишга уринган ноаниқ, парда ортидаги келишув – исталган нарса бўлиши мумкин, лекин шаффоф эмаслиги аниқ", – дейилади баёнотда.
Жанни Инфантино молиявий ишларни етарлича олиб бора олмагани учун ҳам танқид қилинган.
"Захирада 5 миллиард доллардан ортиқ маблағ борлигига қарамай, у ассоциациялар пулларини ўйин манфаати учун ишлатмади. УЕФА зудлик билан бутун дунё бўйлаб ва футболнинг барча соҳаларидаги ҳамкорлар ва манфаатдор томонлар билан мавжуд ФИФА Форвард дастури орқали ресурсларни тақсимлашнинг янги усулини таклиф қилиш учун иш бошлайди.
Биз ФИФА ҳисоб рақамларида бекор ётган бу пулларнинг бир қисмини оммавий футбол ва умуман, ФИФАга аъзо бўлган 211 мамлакатнинг ҳар бирида футбол ривожига туртки бериш учун ишлатишни бошлашимиз керак. Лекин бунинг учун уйдаги кумушни олиб чиқиб сотиш шарт эмас", – дея қайд этган УЕФА матбуот хизмати.
Мурожаат таҳдидли якунланган.
"Бу бутун футболнинг ғалабаси. Аммо иш бу билан тугамаслиги керак. Таклиф рад этилди. ФИФАга бўлган ишончни тиклаш вазифаси энди бошланмоқда", – дея қўшимча қилган европаликлар.
**Воз кечиш ёрдам бермади**
Эслатиб ўтамиз, УЕФА ва Инфантино ўртасидаги очиқ можаро ФИФА президентининг жаҳон футболи даромадларини бошқариш тизимини ислоҳ қилиш режалари фонида авж олганди. Июл ойи охирида швейцариялик амалдор жаҳон чемпионатлари ва бошқа йирик турнирлар учун барча медиа, ҳомийлик ва бошқа ҳуқуқларни аксияларининг бир қисмини ташқи инвесторларга сотиш режалаштирилган алоҳида тузилмага ўтказмоқчи экани маълум бўлди.
Бу ғоя дарҳол жуда салбий қабул қилинди: УЕФА турнирларни бойкот қилиш билан таҳдид қилди, КОНКАКАФ, ОФК ва КОНМеБОЛ ҳам танқидий муносабат билдирди.
Аввалига ФИФА бу ислоҳотни сақлаб қолишга уринди.
"Лойиҳани яратиш фақат ФИФАга аъзо барча миллий ассоциациялар ўз мамлакатларида футболни тижорий ривожлантиришда тўлиқ иштирок этиш имкониятига эга бўлиши учун таклиф этилган. Бироқ, бу ФИФА ва жаҳон футболи қадриятлари ёки бошқарув тизимига зарар етказмаслиги керак. Ҳеч ким футболни сотмайди. ФИФА ҳеч қачон бундай вариантни кўриб чиқмаган бўларди", – дейилган расмий баёнотда.
Бу оқлов ёрдам бермаганидан кейин Инфантино яна бир баёнот бериб, лойиҳа тўхтатилишини маълум қилди.
"Барча фикр-мулоҳазаларни диққат билан тинглаб, ушбу лойиҳа, қўллаб-қувватлов даражасидан қатъи назар, дастлаб қўйилган мақсадга бошқа мос келмайдиган жиддий келишмовчиликларни келтириб чиқарди деган хулосага келдик", – деди у.
Инфантино ФИФАнинг мақсади "ҳар доим бирлаштириш ва такомиллаштиришдан иборат бўлган ва шундай бўлиб қолиши"ни таъкидлаган.
У ФИФА ушбу таклиф устида ишлашни тўхтатишини маълум қилган. Шу билан бирга, яқин вақтлар ичида барча манфаатдор томонлар иштирокида учрашув ўтказилиб, футболни янада ривожлантириш масалалари муҳокама қилиниши қўшимча қилинган.
Афтидан, бу юриш ҳам наф бермади – УЕФА аллақачон Инфантинога қарши курашишга қатъий бел боғлаган. Функсионер бу синовдан энди қандай ўтишини кузатиш қизиқ бўлади.