Украинадаги рейтинглар: Залужний ва Федоров Зеленскийдан олдинда
Агар яқин вақт ичида Украинада президентлик сайлови ўтказилса, амалдаги президент Володимир Зеленский биринчи турда энг кўп овоз тўплаши мумкин. Бироқ СОСИС маркази ўтказган ижтимоий сўров натижаларига кўра, иккинчи турда у собиқ Қуролли кучлар бош қўмондони Валерий Залужний ёки собиқ мудофаа вазири Михаил Федоровга мағлуб бўлиши эҳтимолдан холи эмас.
Украинадаги рейтинглар: Залужний ва Федоров Зеленскийдан олдинда
СОСИС ижтимоий ва маркетинг тадқиқотлари маркази томонидан Украинада ўтказилган сўровнома натижаларига кўра, агар президентлик сайловлари яқин орада бўлиб ўца, биринчи турда Володимир Зеленский 22,3 фоиз овоз билан етакчилик қилади. Иккинчи ўринни Украина Қуролли кучларининг собиқ бош қўмондони ва ҳозирда Буюк Британиядаги элчи Валерий Залужний 21,4 фоиз овоз билан эгаллайди.
Кейинги ўринларда собиқ мудофаа вазири Михаил Федоров (13,1 фоиз), президент офиси раҳбари Кирилл Буданов (8,3 фоиз) ва собиқ президент Пётр Порошенко (6,1 фоиз) жойлашган.
Сўровнома натижаларига кўра, иккинчи турда Залужний Зеленский устидан сезиларли устунлик билан ғалаба қозонади. Овоз беришда иштирок этишини билдирган ва ўз танловини аниқлаган респондентлар орасида Залужний 66,2 фоиз, Зеленский эса 33,8 фоиз овоз тўплайди.
Шунингдек, агар иккинчи турга Михаил Федоров ёки Кирилл Буданов чиқса, улар ҳам Зеленскийни шунга ўхшаш фарқ билан мағлуб этиши мумкинлиги қайд этилган. Фақат Пётр Порошенко билан эҳтимолий баҳсда Зеленский устунликка эга бўлади.
Парламент сайловлари бўлиб ўтган тақдирда эса шартли равишда шакллантирилган Залужний блоки 19,4 фоиз, Федоров блоки 17,9 фоиз овоз тўплаши мумкин. "Халқ хизматкори" партияси эса 12,7 фоиз билан учинчи ўринни эгаллаган.
Тадқиқот шунингдек, респондентларнинг 62,5 фоизи Михаил Федоровнинг мудофаа вазири лавозимидан озод этилишини қўллаб-қувватламаганини кўрсатди. Шу билан бирга, иштирокчиларнинг аксарияти Қуролли кучлар бош қўмондони Александр Сирскийнинг лавозимдан кетишини маъқуллаган.
СОСИС сўровномаси 28-июлдан 2-августгача Украина ҳукумати назоратидаги, фаол жанговар ҳаракатлар олиб борилмаётган ҳудудларда истиқомат қилувчи 2 минг нафар вояга етган фуқаро ўртасида ўтказилган. Тадқиқотнинг эҳтимолий хатолик даражаси ±2,6 фоизни ташкил этади.