Таиланд мактабида отишма: ўқувчи дастлаб бобо-бувисини ўлдирган
Таиландда мактаб ўқувчиси томонидан содир этилган отишма натижасида жами етти киши ҳалок бўлди. Ҳужумдан аввал ўсмир ўз уйида бобо-бувисини отиб ўлдирган. Бу ҳақда Реутерс агентлиги хабар берди.
Воқеа 7-август куни содир бўлган. Ҳалок бўлганларнинг беш нафари Дебсирин Нонтҳабури мактаби қурбонлари бўлиб, ўсмир ҳужумдан сўнг ўз жонига қасд қилган. Таиланд полицияси бу ҳодисани 2022-йилдан буён мамлакатдаги энг даҳшатли оммавий қотиллик деб баҳоламоқда.
**Тафсилотлар**
Ўсмир ҳужумда бобосига тегишли қуролдан фойдаланган ва мактабда камида 26 марта ўт очган. Унинг қуролидан яна 34 та ўқ топилган. Ҳужум натижасида жами 23 киши яраланган. Таълим вазири Прасерт Жантараруангтонг қурбонлар орасида ўқувчилар ҳам борлигини маълум қилди. Отишмага нима сабаб бўлгани ҳозирча аниқланмоқда.
Дебсирин мактабига 1885-йилда Таиланд қироли Чулалонгкорн томонидан асос солинган. Бу таълим муассасасини кўплаб таниқли шахслар, жумладан, дипломатлар, спортчилар ва бир неча бош вазир битирган. 2025-ўқув йилида мактабда қарийб 3100 нафар ўқувчи ва 147 нафар ўқитувчи таълим олган.
**Таиланддаги оммавий отишмалар тарихи**
Таиланднинг яқин тарихидаги энг даҳшатли оммавий қотиллик 2022-йилда содир бўлган. Ўшанда ишдан бўшатилган собиқ полициячи уч соат давомида қурол ва пичоқ билан ҳужум уюштириб, 36 кишини ўлдирган. Унинг қурбонлари орасида ўз хотини, ўғли ва болалар боғчасида ухлаётган 22 нафар бола ҳам бўлган.
2020-йилда эса бир аскар Накҳон Ратчасима шаҳридаги савдо марказида отишма уюштириб, 29 кишининг ҳаётига зомин бўлган. 2025-йил июл ойида қуролланган шахс Бангкок бозорларидан бирида беш кишини, жумладан, қўриқчилар ва бир сотувчини ўлдириб, сўнг ўз жонига қасд қилган.
2023-йилда 14 ёшли ўсмир Бангкокдаги савдо марказида икки кишини ўлдириб, беш кишини яралаган. У жиноят вақтида интернет орқали харид қилинган тўппончадан фойдаланган.
**Қурол назоратини кучайтириш чоралари**
2023-йилдаги отишмадан сўнг ўша вақтда ички ишлар вазири бўлган Анутин қурол назоратини кучайтириш бўйича бир қатор чора-тадбирларни жорий этишга буйруқ берган. Буларга янги лицензиялар беришни вақтинча тўхтатиш, қурол импортини чеклаш ва 20 ёшга тўлмаган шахсларнинг отиш полигонларига киришини тақиқлаш киради.
Узоқ муддатли чоралар қаторига қурол эгаларининг руҳий саломатлиги ва психологик ҳолатини баҳоловчи тиббий маълумотнома талаб қилиш, шунингдек, айрим турдаги қурол лицензиялари учун аниқ амал қилиш муддатини белгилаш ҳам киритилган.
Смалл Армс Сурвей ташкилоти ҳисоб-китобларига кўра, Таиландда аҳоли қўлида тахминан 10,3 миллион дона ўқотар қурол мавжуд. Бу ҳар 100 кишига 15 та қурол тўғри келишини англатади.