Самолётда қайси ўриндиқларни танламаган маъқул? Стюардесса тавсиялари

Самолётда қайси ўриндиқларни танламаслик керак? Стюардесса маслаҳатлари

Аксарият йўловчилар парвознинг имкон қадар қулай ўтишини хоҳлайди. Тўғри танланган жой нафақат парвозни қулай қилади, балки кўпроқ шахсий макон ва овқат тарқатилганда исталган таомни танлаш имкониятини ҳам оширади.

Ижтимоий тармоқларда ўз касбий тажрибаси билан бўлишиб борадиган стюардесса Сандра Женни Квон эконом классдаги энг қулай ўриндиқлар қайсилар эканини маълум қилди. У, шунингдек, йўловчиларга қайси жойлардан воз кечишни тавсия этди.

**Самолётда қайси ўриндиқларни танламаган маъқул?**

Стюардессанинг сўзларига кўра, қаторнинг ўртасидаги ўриндиқлар энг ноқулай ҳисобланади. Чунки бундай жойда ўтирган йўловчи на дераза томонга бемалол суяниши, на ёнидагиларни безовта қилмасдан йўлакка чиқиши мумкин.

Бундан ташқари, салоннинг ҳар бир бўлимидаги охирги қатор ўриндиқлари ҳам тавсия этилмайди. Аксарият самолётларда бу ўриндиқларнинг суянчиқлари умуман эгилмайди ёки жуда кам эгилади. Бу эса, айниқса, узоқ парвозларда сезиларли ноқулайлик туғдиради.

Яна бир тавсия этилмайдиган жой — фавқулодда чиқиш эшиклари ёнидаги ўриндиқлар. Гарчи бу ерда оёқни бемалол чўзиш учун кўпроқ жой бўлса-да, ўриндиқ остига шахсий буюмларни қўйишга рухсат берилмайди. Бундан ташқари, столча ва ўриндиқ конструксияси ҳам одатдагидан камроқ қулай бўлиши мумкин.

**Энг қулай ўриндиқлар қаерда?**

Кўпчилик энг яхши ўриндиқлар самолётнинг олд қисмида жойлашган деб ҳисоблайди. Бироқ Сандра Квон бунинг аксини тавсия қилади ва орқа қаторларга эътибор қаратишни маслаҳат беради.

Унинг тушунтиришича, авиакомпаниялар оғирликни бир текис тақсимлаш мақсадида аввал самолётнинг олд қисмини тўлдиришга ҳаракат қилади. Натижада орқа қисмдаги ўриндиқларда ёнингиз бўш қолиш эҳтимоли кўпроқ бўлади. Бу эса парвозни анча қулайроқ ўтказишга ёрдам беради.

Шу билан бирга, мутахассис ҳожатхона ёнидаги ўриндиқларни танламасликни тавсия қилади. Сабаби бу ерда йўловчиларнинг доимий қатнови, навбатлар ва баъзан ёқимсиз ҳидлар парвоз таассуротини бузиши мумкин. Унинг фикрича, ҳожатхонадан камида беш қатор наридаги ўриндиқларни танлаган маъқул.

**Эконом классда қайси ўриндиқ энг мақбул?**

Сандра Квоннинг айтишича, у ўзи ҳеч қачон иллюминатор ёнидаги ўриндиқни танламайди. Сабаби ҳожатхонага чиқиш керак бўлганда ёнидаги йўловчилардан туришни сўрашга тўғри келади ва бу ҳар доим ҳам қулай эмас.

Олд қаторларнинг яна бир афзаллиги шундаки, овқат айнан шу ердан тарқатила бошланади. Шу сабабли таом танлови чекланган бўлса, ўзингиз истаган вариантни олиш имконияти юқорироқ бўлади.

Барча омилларни ҳисобга олган ҳолда, стюардесса эконом классдаги энг яхши танлов сифатида самолётнинг орқа қисмидаги йўлак томондаги ўриндиқларни тавсия қилади. Хусусан, салон схемасига қараб 49 С, 49 Д, 49 Ф ёки 49 Г ўриндиқлари энг мақбул вариант саналади. Унинг фикрича, бу жойлар ёнингиздаги ўриндиқ бўш қолиш эҳтимоли, йўлакка қулай чиқиш ва умумий қулайлик жиҳатидан энг яхши танлов ҳисобланади.