Россиядаги пляжга дрон қулаб тушди, етти киши ҳалок бўлди (видео)
Россиянинг Геленжик шаҳри яқинидаги пляжга 3-август куни Украина дрони қулаб тушиши оқибатида етти киши ҳалок бўлди, деб хабар берди “Медуза”. Қурбонларнинг уч нафари бола бўлган. Ҳодиса натижасида 58 киши тан жароҳати олган, улардан 21 нафари касалхонага ётқизилган.
Шаҳар раҳбари Алексей Богодистов соат 08:34 да дрон таҳдиди ҳақида хабар берган, бироқ 10 дақиқадан сўнг хавф бекор қилинган. Маҳаллий аҳоли ва сайёҳлар Архипо-Осиповка қишлоғида огоҳлантириш сиреналари бўлса-да, улар эшитилмаганини таъкидлади.
Краснодар ўлкаси губернатори Вениамин Кондратьев Телеграм каналида ҳужум фуқаролик инфратузилмасига қаратилганини ёзди ва Архипо-Осиповкага “дрон қолдиқлари” тушганини иддао қилди. Бироқ, воқеа жойидан олинган видеоларда дроннинг бутун ҳолатда қулагани акс этган.
“Агенцтво” нашри ҳарбий экспертларга таяниб, дрон Россия ҳаво ҳужумидан мудофаа тизими ҳаракатлари сабабли пляжга қулаган бўлиши мумкинлигини ёзди. Бу хулосага дроннинг учиш траекторияси ва видеоларда эшитилган кетма-кет ўқ овозлари асос бўлган. Гувоҳлар ҳам отишма ҳақидаги маълумотни тасдиқлаган, бу ҳаво ўт очиш гуруҳининг ҳаракатига ишора қилади. ОСИНТ-таҳлилчиси Кирилл Михайловнинг қайд этишича, дрон пастлай бошлагач, ўқ товуши тўхтаган.
Ҳарбий таҳлилчи Девид Шарп Тҳе Инсидер журналистлари билан суҳбатда бу фикрга қўшилиб, дроннинг қулашига носозлик, зарба натижасида шикастланиш ёки радиоелектрон кураш сабаб бўлган бўлиши мумкинлигини айтди. Унинг фикрича, бу қасддан пляжга қилинган ҳужум версиясидан кўра ҳақиқатга яқинроқ. Шарп, шунингдек, ўқ овозлари яқин атрофда қўриқланаётган обьект борлигини кўрсатишига эътибор қаратди ва айнан ўша обьект дроннинг нишони бўлгани тахмин қилинмоқда. Эксперт обьект номини ошкор қилмади.
“Агенцтво”нинг ёзишича, дрон қулаган пляж “Рассвет” дам олиш базаси рўпарасида жойлашган. Ушбу база мамлакатнинг асосий ракета-космик корхоналаридан бири бўлмиш “НПО машиностроения” филиалидир. Шунингдек, Қора денгиз бўйида, Геленжик яқинидаги Прасковьевка қишлоғи атрофида “Путин саройи” ҳам жойлашган.