Россияда икки йил ичида олтита генералга суиқасд қилинди (рўйхат)

**Россияда икки йил ичида олтита генералга суиқасд уюштирилди (рўйхат)**

Уруш бошланганидан буён Россиянинг юқори мартабали генераллари нафақат жанг майдонида ҳалок бўлди, балки фронт ортида ҳам суиқасд қурбони бўлди. Москва ва Москва вилоятида содир бўлган портлашларда камида уч генерал ҳаётдан кўз юмди, яна бирига ўқ узилди, аммо у тирик қолди.

Сўнгги қурбон, тахминларга кўра, 2026-йил май ойида Россия Ҳаво-космик кучлари раҳбари этиб тайинланган Александр Чайко бўлиши керак эди. Айнан уни 1-август куни Москвадаги “Балзи Росси” ресторанида содир бўлган портлашда нишонга олиш режалаштирилган эди. Бироқ, ҳукумат бу борада деярли ҳеч қандай расмий баёнот бермади. “Медуза” икки йил ичида суиқасдга учраган олти нафар генерал ҳақида маълумот берди.

**2024-йил декабр**

Россиянинг радиацион, кимёвий ва биологик ҳимоя қўшинлари бошлиғи Игор Кириллов қўпорувчилик натижасида ўлдирилган биринчи юқори мартабали генерал бўлди. У Москванинг Рязан проспектидаги уйидан чиқишда самокатга ўрнатилган бомба портлаши оқибатида ҳалок бўлган.

У билан бирга унинг ёрдамчиси Иля Поликарпов ҳам вафот этган. Терактни ижро этишда Ўзбекистон фуқароси айбланган, у сўроқ пайтида Украина махсус хизматлари томонидан ёлланганини айтган. Эркак умрбод қамоқ жазосига ҳукм қилинган.

**2025-йил апрел**

Россия Қуролли кучлари Бош штаби Бош оператив бошқармаси бошлиғи ўринбосари, генерал-лейтенант Ярослав Москалик Балашиха шаҳрида содир бўлган портлашда ҳалок бўлди. Бомба турар жой биноси ҳовлисида тўхтаб турган Волксваген автомобилига ўрнатилган. Генерал-лейтенант машинага яқинлашганда у портлаган.

Москаликни ўлдиришда айбланиб Игнат Кузин қўлга олинган. Тергов уни “Украина махсус хизматлари агенти” деб атаган. У ҳам умрбод қамоқ жазосига ҳукм қилинган.

**2025-йил декабр**

Россия Қуролли кучлари Бош штаби тезкор тайёргарлик бошқармаси бошлиғи, генерал-лейтенант Фанил Сарваров ўз автомобили портлаши оқибатида ҳалок бўлди. Портлаш Москва жанубидаги Ясенева кўчасидаги автотураргоҳда содир бўлган. Генерал машинага ўтириб, бир неча метр ҳайдашга улгурган.

Тергов қўмитаси Сарваровнинг ўлдирилишидан сўнг жиноят иши қўзғатган. Бироқ, қўлга олинганлар ёки гумонланувчилар ҳақида маълумот берилмаган.

**2026-йил феврал**

Генерал-лейтенант Владимир Алексеев Москвадаги турар жой биносидан чиқаётганида отиб ўлдирилган. У Россия Бош штаби Бош бошқармаси бошлиғининг биринчи ўринбосари лавозимида ишлаган.

У, хусусан, Евгений Пригожин исёни пайтида “Вагнер” раҳбари билан музокарада иштирок этган. Терговчилар Алексеевни Украина билан урушда иштирок этаётган Россия “кўнгиллилар” тузилмаларининг асосий кураторларидан бири деб атаганди.

**2026-йил апрел**

Генерал-маёр Азатбек Умурбеков 2022-йилда Киев вилоятига бостириб кирган 64-мотоўқчи бригадасига қўмондонлик қилган. Украина ҳукумати ушбу бригада ҳарбийларини Буча шаҳридаги тинч аҳолини ўлдириш ва қийноқларга алоқадор деб ҳисоблайди.

Умурбековга суиқасд ҳақида фақат аноним Телеграм каналлар ёзган. “ВЧК-ОГПУ” канали маълумотларига кўра, портловчи қурилма Хабаровск ўлкасидаги Князе-Волконское-1 қишлоғидаги ҳарбий гарнизон ҳудудидаги почта қутисига жойлаштирилган. Портлаш оқибатида ўқув алоқа баталёни командири ҳалок бўлган. Бу суиқасд ҳақида бошқа ҳеч нарса маълум эмас.

**2026-йил август**

Генерал-полковник Александр Чайко суиқасд қилинганлар орасида энг юқори мартабали генераллардан биридир. 2026-йил май ойида у Россия Ҳаво-космик кучлари раҳбари этиб тайинланган. Июл ойининг охирида 55 ёшни қаршилаган. 1-август куни Москвадаги Баррикада кўчасидаги кўп қаватли уйда, Чайко туғилган кунини нишонлагани тахмин қилинаётган “Балзи Росси” ресторани ёнида портлаш содир бўлган.

Расмий равишда унинг исми ҳеч қаерда тилга олинмаган. Унинг суиқасд нишони бўлгани ҳақида Телеграм каналлар хабар берган. Тергов қўмитаси ҳозирча жиноят иши қўзғатилгани ҳақида хабар бермаган.