Россия Харкив ва Одессага, Украина – Белгородга зарба берди
Зеленский 40 кунлик «таъсир операцияси» якунларини сарҳисоб қилди ва логистика бўйлаб янги зарбалар билан таҳдид қилди.
Россия Харкив ва Одессага ҳужум қилди, Украина эса Белгородга зарба берди.
**Белгород**
9-августга ўтар кечаси Украина дронлари Белгород шаҳрига ҳужум қилди. Белгород области оператив штабининг хабарига кўра, ушбу ҳужум натижасида 29 та кўп квартирали уй, учта маъмурий бино, учта ижтимоий ва олтита тижорий объект шикастланган.
Дастлаб, Белгород области губернатори вазифасини бажарувчи Александр Шуваев ҳужум оқибатида уч киши ҳалок бўлгани ва 25 киши, жумладан, тўрт ва тўққиз ёшли болалар жароҳатлангани ҳақида маълумот берган эди. Болалардан бири шифохонага ётқизилган бўлиб, унинг аҳволи ўртача оғирликда баҳоланган. Кейинроқ, оператив штаб кўп квартирали уйлардан бирининг вайроналарини тозалаш чоғида яна бир эркакнинг жасади топилганини эълон қилди. Шунингдек, ўта оғир аҳволда шифохонага олиб борилган яна бир эркак вафот этган, шу билан қурбонлар сони беш нафарга етган.
Ушбу ҳужум, вайронгарчилик кўлами бўйича 2023-йил 30-декабрдан буён энг жиддий зарба бўлди. Ўшанда ракета зарбалари натижасида 25 киши ҳалок бўлган, 100 дан ортиқ киши яраланган ва 30 та кўп квартирали уй шикастланган эди.
5-август куни губернатор Шуваев Россия президенти Владимир Путин билан учрашувда Украинанинг Россия бўйлаб зарбаларни кучайтириши натижасида унинг бошқарувидаги ҳудуд энг кўп зарар кўраётганини таъкидлаган эди.
**Харкив ва Одесса**
9-август куни тонгда Россия қўшини Харкивга зарба берди. Маҳаллий расмийларнинг хабарига кўра, ракеталардан бири Салтовка туманидаги кўп қаватли турар жой биносига келиб тушган ва унинг еттинчи қаватидан тўққизинчи қаватигача бўлган қисми вайрон бўлган. Ушбу бинога қўшни жойлашган яна бир кўп қаватли уй ҳам зарба остида қолган. Сўнгги маълумотларга кўра, Харкивга қилинган ҳужум натижасида икки киши ҳалок бўлган ва 37 киши жароҳатланган.
Бундан ташқари, Россия Одессага ҳам ракета ва дронлар билан ҳужум қилди. Шаҳарнинг икки туманида бир нечта турар жой бинолари шикастланган ва қисман вайрон бўлган. Жами 12 киши жароҳат олган.
**Зеленский – Россияга «таъсир операцияси» ҳақида**
Украина президенти Володимир Зеленский Россияга қарши ўтказилган 40 кунлик «таъсир операцияси» натижаларидан мамнунлигини билдирди ва уни «муваффақиятли» деб атади. Бу ҳақда у Украина телемарафонида маълум қилди.
Зеленскийнинг сўзларига кўра, Россия қўшини Украина логистикасига зарба беришни кучайтиргач, Украина бунга «жавоб қайтариш»га қарор қилган. «У ерда йўқотишлар жиддий – триллион рубл… Бу украин кучларининг жуда муваффақиятли амалиёти бўлди. Шубҳасиз, мен мамнунман. Улар қанча йўқотишганини, катта муаммоларга дуч келишганини биламиз», – деди Зеленский ва амалиётда Украина қуролли кучлари, Махсус амалиётлар кучлари, ҳарбий разведка ҳамда Украина хавфсизлик хизмати иштирок этганини қўшимча қилди.
Зеленский Москвани Украина Россиянинг «заиф жойларидан хабардорлиги» ҳақида огоҳлантирди:
«Логистика – фақат украинларнинг эмас, балки барчанинг заиф жойидир. Логистика – бу кундалик ҳаёт, одатлардир. Бизда Россия тажовузи бошланганидан буён нормал ҳаёт, бундай одатлар йўқ. Россиядагилар буни сезмаган. Албатта, Россияда маҳсулот логистика бузилиши туфайли истеъмолчига етиб бормаса, Россиядаги одамлар ҳам буни ҳис қилиши аниқ... Мен Россияга Украина логистикасига зарба беришни давом эттиришни маслаҳат бермаган бўлардим, чунки биз Россия логистикасини ўрганиб чиқдик.»
У Россия «электр тармоқлари ва энергетика объектларини ҳимоя қилиш учун Москва атрофида ҳаво ҳужумидан мудофаа тизимларининг учта ҳалқасини ҳосил қилгани»ни таъкидлади. Унинг фикрича, Москвадагилар Украина Россия ҳужумларига мос равишда жавоб қайтаришини билади.
Зеленский Россияга қарши 40 кунлик «таъсир операцияси» ҳақида июн ойи охирида эълон қилган эди. У бу амалиётдан мақсад «тажовузкор давлатни урушни тўхтатишга ундаш» эканини айтган эди.
«Таъсир операцияси» даврида Украина Вилдберриесънинг камида 20 та омборига, камида 25 та нефтни қайта ишлаш заводлари ва нефт-газ инфратузилмасидаги бошқа объектларга зарба берди, шунингдек, Қора денгиз ва Азов денгизида танкерлар ҳамда юк кемаларига камида 200 марта ҳужум уюштирди. Ўз навбатида, Россия Украинани баллистик ракеталар билан ўққа тутишни кучайтирди. Украина томони маълумотларига кўра, июл ойида 381 та ракета учирилган – бу уруш бошидан буён исталган ойдагидан кўра кўпроқдир.