Россия кузда НАТОга ҳужум қилиши мумкин — АҚШ разведкаси
**АҚШ разведкаси: Россия 2026-йил кузида НАТОга ҳужум қилиши мумкин**
Америка Қўшма Штатлари махсус хизматлари Владимир Путиннинг 2026-йил кузидаёқ НАТОнинг шарқий қанотига ҳужум қилиш эҳтимолини истисно этмаяпти. Тҳе Валл Стреет Жоурнал нашрининг хабар беришича, киберҳужумлардан тортиб кичик десант операцияларигача бўлган турли ссенарийлар кўриб чиқилмоқда.
Илгари АҚШ Путин Украинадаги уруш давом этаётган бир пайтда НАТОга аъзо мамлакатларни провокация қилмайди, деб ҳисоблар эди. Бироқ, америкалик расмийларнинг ВСЖ нашрига маълум қилишича, 2026-йил бошида бу баҳолаш ўзгарган.
Украина дронлари Россиянинг нефт инфратузилмасига тобора кўпроқ зарар етказмоқда. Фронтда эса Россия қўшинлари катта йўқотишлар эвазига арзимас миқёсда илгариламоқда. Шу сабабли Путин қийин аҳволда қолган ва унга қандайдир ҳарбий муваффақият керак.
АҚШ ва Европа Россиянинг НАТОнинг матонатини синовдан ўтказаётганига оид белгиларни тобора кўпроқ кўрмоқда. Буларга Полшага тушган Россия қанотли ракеталари ва сўнгги ҳафталарда Руминия ҳаво ҳудудига бир неча бор кириб келган дронлар киради.
АҚШ махсус хизматлари маълумотларига кўра, Россия ҳужуми 2026-йил кузидан 2029-йилгача бўлган муддатда содир бўлиши мумкин. Америка расмийларининг таъкидлашича, Путиннинг мақсади алянсни парчалашдир.
Энг хавфли ссенарий – чекланган десант операцияси амалга оширилиши эҳтимоли кичик бўлса-да, вақт ўтиши билан ортиб бормоқда. Шунингдек, 2014-йилда Қримда бўлгани каби, ҳудудларни эгаллаш учун қуролли гуруҳларни юбориш эҳтимоли ҳам мавжуд.
Бироқ, ҳар иккала ссенарий ҳам эҳтимоли кам деб ҳисобланади. Чунки бу алянс аъзоларини жамоавий мудофаага мажбур қиладиган НАТО шартномасининг 5-моддасини ишга тушириб юборади.
“Биз ҳар қандай ссенарийга тайёргарлик кўрмоқдамиз. НАТО вазиятни кузатмоқда. Зарур бўлганда хавфнинг олдини олишга ва мудофаага тайёрмиз, буни амалда ҳам кўрсатишда давом этяпмиз”, деди НАТО матбуот котиби, полковник Мартин ЎДоннелл.
Аввалроқ Шимолий Корея Украинага қарши уруш учун Россияда ракета бўлинмасини жойлаштиришни бошлагани ҳақида хабар берилганди.