Қуёш панелларини ўрнатган 68 мингдан ортиқ фуқарога 330 млрд сўмдан зиёд субсидия берилди
Энг кўп субсидия Бухоро, Хоразм ва Қашқадарё вилоятлари ҳиссасига тўғри келган
Ўзбекистонда 68 мингдан зиёд фуқарога қуёш панеллари учун 330 миллиард сўмдан ортиқ субсидия ажратилди.
2024-йилнинг январидан июнигача бўлган даврда Ўзбекистонда ўз хонадонларига қуёш панелларини ўрнатган 68,6 минг нафар жисмоний шахсга давлат буджетидан жами 330 миллиард 822,7 миллион сўм миқдорида субсидия берилди. Бу ҳақда Солиқ қўмитаси маълумот берди.
Қўмита хабарига кўра, фақатгина жорий йилнинг июн ойида фуқароларга 100 миллиард 715,1 миллион сўм субсидия тўланган.
Энг кўп субсидия қуйидаги ҳудудларга тўғри келган:
* Қашқадарё вилояти: 20,5 миллиард сўм
* Фарғона вилояти: 19,8 миллиард сўм
* Бухоро вилояти: 19,5 миллиард сўм
* Хоразм вилояти: 18,5 миллиард сўм
Шунингдек, Самарқанд вилоятига 17,9 миллиард сўм, Тошкент шаҳрига 18 миллиард сўм, Тошкент вилоятига 15,9 миллиард сўм, Наманганга 13 миллиард сўм, Андижонга 6,2 миллиард сўм, Сурхондарёга 5,5 миллиард сўм, Жиззахга 4,8 миллиард сўм ва Сирдарёга 3,6 миллиард сўм субсидия ажратилган.
Фуқаролар субсидия маблағларини "Солиқ" мобил иловасидаги "Кешбек ва имтиёзлар" хизмати орқали банк карталарига ўтказиб олишлари мумкин.
Эслатиб ўтамиз, 2023-йил 1-апрелдан бошлаб "Қуёшли хонадон" дастури доирасида ўз хонадонларига қуёш панелларини ўрнатган жисмоний шахсларга ягона электр энергетика тизимига узатилган ҳар бир киловатт-соат электр энергияси учун 1000 сўмдан субсидия бериб келинмоқда.