Қуёш панеллари учун 330,8 млрд сўм субсидия ажратилди
«Қуёшли хонадон» дастури бўйича тўловлар ҳажми яна ўсди. Энг катта маблағ қайси ҳудудлар ҳиссасига тўғри
Қуёш панеллари учун 330,8 млрд сўм миқдорида субсидия ажратилди. Солиқ қўмитасининг хабарига кўра, 2026-йилнинг январидан июнигача бўлган даврда "Қуёшли хонадон" дастури орқали 68,6 минг нафар жисмоний шахс давлат буджетидан жами 330,8 млрд сўмдан зиёд субсидия олди.
Ушбу маблағлар электр тармоқларига узатилган қуёш энергияси учун тўланган. Фақатгина 2026-йил июн ойининг ўзида фойдаланувчиларга 100,7 млрд сўмлик субсидия берилган.
Мазкур даврда "Қуёшли хонадон" дастури иштирокчилари сони ҳам сезиларли даражада ошган. Январ-июн ойларида дастурдан фойдаланганлар сони 68,6 минг нафарни ташкил этган бўлса, июн ойида бу кўрсаткич 61,1 минг нафарга етган.
Субсидияларнинг энг катта қисми Бухоро вилоятига тўғри келди, бу ерда олти ой давомида 61,9 млрд сўм субсидия тўланган. Кейинги ўринларда Хоразм вилояти 60,5 млрд сўм ва Қашқадарё вилояти 37,3 млрд сўм билан қайд этилди. Шунингдек, Қорақалпоғистон Республикасида 38,9 млрд сўм, Навоий вилоятида 25,3 млрд сўм ва Фарғона вилоятида 22,1 млрд сўм субсидия ажратилди.
Энг кам маблағлар Сирдарё вилоятида (3,6 млрд сўм), Жиззах вилоятида (4,8 млрд сўм) ҳамда Сурхондарё вилоятида (5,5 млрд сўм) қайд этилди.
Маълумот учун, 2023-йил 1-апрелдан бошлаб "Қуёшли хонадон" дастури доирасида уйига қуёш панеллари ўрнатган жисмоний шахсларга ягона электр энергетикаси тизимига узатилган ҳар бир киловатт-соат электр энергияси учун 1000 сўм миқдорида давлат субсидияси ажратиб келинмоқда.