Қашқадарёда хотинига телефон отиб бошини ёрган эркак 1,5 йилга қамалди

Қашқадарёда оилавий жанжал вақтида хотинининг бошига телефон отиб, унга тан жароҳати етказган эркакка суд ҳукми ўқилди. “Дарё” суд ҳужжатлари билан танишди.

Маълум бўлишича, Яккабоғ туманида яшовчи 34 ёшли К.Қ. 2025-йил сентябрида турмуш ўртоғи Ф.Э. билан жанжаллашиб, унга тан жароҳати етказгани учун маъмурий жавобгарликка тортилган.

Ўшанда Жиноят ишлари бўйича Яккабоғ тумани суди унга нисбатан базавий ҳисоблаш миқдорининг 5 баравари, яъни 2 миллион 60 минг сўм жарима жазоси тайинланган. Бироқ К.Қ. белгиланган жазодан тегишли хулоса чиқармасдан, турмуш ўртоғига нисбатан зўравонликни давом эттирган.

Навбатдаги жанжал 2026-йилнинг 1-феврал куни юз берган. Ўша куни К.Q.ning онаси, опаси ва укаси эр-хотин яшаётган ижарадаги уйга меҳмонга келган. Бироқ Ф.Э. аввалги келишмовчиликлар сабаб қайнонасини уйга киритишни истамаган. Шу пайтда К.Қ. ишдан уйга келганида ҳолатни кўриб, жаҳли чиққан ва меҳмонларнинг олдида аёлининг юзига бир неча марта урган.

Шундан кейин эркак кўчага чиқиб, синфдошлари билан чойхонага борган ва спиртли ичимлик истеъмол қилган. Соат 22:30 атрофида уйга қайтиб, жанжални давом эттирган ва қўлидаги телефонни хотинига қарата отган. Телефон аёлнинг бошига тегиб, оғир тан жароҳати етказган.

“Бошимдан қон оқаётганини кўрса-да, зўравонликни тўхтатмасдан, турли жойларимга тепа бошлади. Қизимни ундан ҳимоя қилиш учун қучоқлаб олганимда биқинига тепиб, бош ва юзимга урди. Қўшнилар чиқиб, ажратишди ва шифохонага олиб боришди”, дея кўрсатув берган аёл.

Шифохонада шифокорлар тез тиббий ёрдам кўрсатиш билан бирга, ҳолат юзасидан ички ишлар органларини хабардор қилишган.

Суд мажлисида эркак айбига иқрор бўлиб, қилмишидан пушаймонлигини билдирган ва енгиллик беришни сўраган. Бироқ аёл турмуш ўртоғи билан ярашмаслигини, эри ундан кечирим сўрамагани ва етказилган зарарни қопламаганини билдириб, унга қонуний чора кўришни сўраган.

Жиноят ишлари бўйича Яккабоғ туман суди К.Q.ni Жиноят кодексининг 126-1-моддаси 3-қисм билан (Оилавий (маиший) зўравонлик) айбдор деб топган ҳамда унга нисбатан 1 йил-у 6 ой муддатга озодликдан маҳрум қилиш жазоси тайинлаган. Шунингдек, жабрланувчига етказилган зарарни ундириш учун фуқаролик ишлари бўйича судга даъво киритиш ҳуқуқи тушунтирилган.

Аввалроқ Тошкент шаҳрида уй масаласидаги низо вақтида собиқ эрининг қўлини тишлаб олган аёл 2 миллион 60 минг сўм жаримага тортилгани хабар қилинганди.

Абубакр Одилжонов