Қамчиқда юк машинаси ва Эписа ёниб кетди

Қамчиқ довонида юк машинаси ва енгил автомобил бутунлай ёниб кетди

Қамчиқ довонида жойлашган А-373 автомобил йўлининг 168-километрида, 2-август куни соат тахминан 8:20 да, Тошкент-водий йўналишида ҳаракатланаётган Исузу русумли юк автомобилида носозлик юзага келган. Бу ҳақда Йўл ҳаракати хавфсизлиги хизмати хабар берди.

Юк машинаси ҳайдовчиси транспорт воситасини йўл четига тўхтатган. Шу пайтда, худди шу йўналишда кетаётган Эписа русумли автомобил ҳайдовчиси бошқарувни йўқотиб, тўхтаб турган Исузу юк машинасининг орқа қисмига бориб урилган. Тўқнашув натижасида ёнғин келиб чиқиб, иккала автомобил ҳам бутунлай ёниб кетган. Ушбу ҳодисанинг видеоси ижтимоий тармоқларда ҳам тарқалган.

Йўл-транспорт ҳодисаси оқибатида Эписа ҳайдовчиси ва унинг йўловчиси енгил тан жароҳатлари олган. Улар ёнғин бошланишидан олдин автомобилдан тушиб қолишга муваффақ бўлишган ва уларга зудлик билан биринчи тез тиббий ёрдам кўрсатилган.

Эслатиб ўтамиз, бир кун аввал Самарқанд вилоятининг Ургут туманида Собалт ва Спарк автомобиллари тўқнашиб, Собалт ёниб кетган эди. Ўша ҳодисада ҳеч ким жароҳат олмаган, ёнғин ФВВ ходимлари томонидан тезда ўчирилган. Ҳозирда ушбу ҳолат юзасидан суриштирув ишлари олиб борилмоқда.