Профилактика инспекторларига устама тўлаш тизими бутун Ўзбекистонда жорий этилади

Профилактика инспекторларига устама тўлаш тизими Ўзбекистон бўйлаб жорий этилади. Тошкент шаҳридаги профилактика инспекторларининг ойлик маошларига 5 баробаргача устамалар киритилди. Бу ҳақда Профилактика хизмати бошлиғи ўринбосари Наимов Раҳим матбуот анжуманида маълум қилди, деб хабар берди “Дарё” мухбири.

Масъулнинг сўзларига кўра, 27-январ куни президент ҳузурида ўтказилган йиғилишдан сўнг, Тошкент шаҳрида жамоат хавфсизлигини таъминлаш ва профилактика хизматини ривожлантириш бўйича алоҳида ёпиқ қарор қабул қилинган. Ушбу қарорга кўра, пойтахтдаги профилактика инспекторлари ва аппарат ходимларига стажига қараб бир баробардан беш баробаргача (меҳнатга ҳақ тўлашнинг энг кам миқдори назарда тутилмоқда — “Дарё” изоҳи) миқдорда устамалар белгиланган.

Мазкур устамалар 1-июлдан ҳисоблана бошлайди. Инспекторлар янги миқдордаги ойлик маошларини жорий йилнинг 20-июл санасидан бошлаб қўлга олади. Тизим республика бўйлаб кенгайтирилади. Масъулнинг таъкидлашича, ҳозирда профилактика инспекторлари мақоми тўғрисидаги қонун лойиҳаси тайёрланмоқда.

Президентга республика бўйича жамоат хавфсизлигини таъминлашда профилактика инспекторларининг ўрнини кучайтиришга қаратилган қарор лойиҳаси тақдим этилган. Бу тажриба республиканинг бошқа ҳудудларидаги профилактика инспекторларига ҳам татбиқ қилинади, дея қайд этди профилактика хизмати вакили. Ҳозирда тегишли ҳужжатлар лойиҳаси устида иш олиб борилмоқда.

Маълумот учун, 27-январ куни ташкил этилган президент Шавкат Мирзиёев иштирокидаги йиғилишда ички ишлар тизимидаги кадрлар қўнимсизлигига барҳам бериш масаласи кўтарилган эди. Йиғилишда профилактика инспекторларини қўллаб-қувватлаш бўйича янгиликлар эълон қилинган. Жумладан, 2026-йил 1-июлдан пойтахтдаги профилактика ходимларига кўп йиллик стажи учун 5 миллион сўмгача ойлик устама берилиши кўзда тутилган эди.