Ўзбекистонда ўқиш учун энг кўп Туркманистон фуқаролари келган
2026-йилнинг январ–июн ойларида Ўзбекистонга таълим олиш мақсадида 21 мингдан ортиқ хориж фуқароси келган. Улар орасида Туркманистон фуқаролари энг катта улушни ташкил этиб, 9,2 минг нафардан ошган.
Ўзбекистонга ўқишга келган хорижликлар сони бўйича Туркманистон фуқаролари етакчилик қилмоқда.
Миллий статистика қўмитасининг хабар беришича, жорий йилнинг дастлабки олти ойида Ўзбекистонга таълим олиш учун жами 21 042 нафар чет эл фуқароси келган. Бу рақам ўтган йилнинг шу даврига нисбатан 11,5 минг нафарга ёки 2,2 бараварга кўпроқдир.
Ўзбекистонда ўқишни танлаган хорижликлар орасида Туркманистон фуқаролари энг кўп бўлиб, уларнинг сони 9 207 нафарни ташкил этади. Ундан кейинги ўринларда Ҳиндистон (3 723 нафар), Тожикистон (1 915 нафар), Хитой (951 нафар), Қирғизистон (834 нафар) ва Покистон (689 нафар) қайд этилган.
Шунингдек, Мисрдан 603 нафар, Жанубий Кореядан 526 нафар, Филиппиндан 367 нафар ва АҚШдан 302 нафар фуқаро Ўзбекистонга ўқиш мақсадида ташриф буюрган. Қолган 1 925 нафар хорижлик бошқа мамлакатлардан келган.
Маълумотларга кўра, Ўзбекистонга таълим олиш учун келаётган хорижликлар сони бир йил ичида икки баравардан зиёдга ошган.