ОСИНТ: Рязан вилоятидаги Вилдберриес омборида ёнғин юз берди
ОСИНТ таҳлиллари билан шуғулланувчи бир қатор Телеграм-каналларига кўра, Украина дронлари ҳужуми ортидан Россиянинг Рязан вилоятида жойлашган Вилдберриес логистика омборида ёнғин чиққан. Вилоят ҳокимияти саноат ҳудудида ёнғин юз берганини тасдиқлаган, аммо жабрланган корхона номини очиқламаган.
ОСИНТ: Рязан вилоятидаги Вилдберриес омборида ёнғин содир бўлди
29-июл куни эрталаб Астра ва Эхиленова+ Телеграм-каналлари очиқ манбалар таҳлили (ОСИНТ) ҳамда фойдаланувчилар томонидан юборилган фото ва видеоларга асосланиб, Рязан вилоятининг Тюшево қишлоғи яқинидаги "Рязанский" индустриал паркида жойлашган Вилдберриес омборида ёнғин чиққанини маълум қилди.
Вилдберриес матбуот хизмати хавфсизлик талабларига мувофиқ Рязан шаҳридаги логистика объектининг тўлиқ эвакуация қилинганини билдирди.
Рязан вилояти губернатори Павел Малкиннинг сўзларига кўра, учувчисиз учиш аппаратлари қолдиқлари тушиши оқибатида саноат ҳудудларида ёнғин келиб чиққан. Бироқ у қайси корхона ёки корхоналар жабрланганига аниқлик киритмади.
Губернаторнинг қайд этишича, ҳодиса натижасида олти киши шифохонага ётқизилган. Уларнинг ҳаётига хавф йўқ ва шифокорлар зарур тиббий ёрдам кўрсатмоқда.
Сўнгги ҳафталарда Украина Қуролли кучлари Вилдберриес компаниясининг Россия ва Россия томонидан қўшиб олинган Қримдаги логистика марказларига бир неча бор ҳужум уюштиргани хабар қилинган. Булар орасида Москва вилояти, Тамбов вилояти, Санкт-Петербург яқини ва Твер шаҳридаги омборлар ҳам бор.
25-июл куни Екатеринбургда ҳам Украина дронлари ҳужуми ортидан Вилдберриес омбори яқинидаги автотураргоҳда ёнғин чиққан, аммо омборнинг ўзи зарар кўрмаган.
"Коммерсант" газетаси маълумотларига кўра, ушбу ҳужумлар натижасида маркетплейснинг умумий майдони 550 минг квадрат метрдан ортиқ бўлган логистика қувватларининг 10 фоиздан зиёдига зарар етган.
Украина президенти Володимир Зеленский аввалроқ Вилдберриес логистика марказларига берилган зарбаларни Россиянинг Украина фуқаролик инфратузилмасига қилган ҳужумларига жавоб деб атаган. Унинг сўзларига кўра, айрим логистика марказлари Россияда дронлар ва навигация ускуналари ишлаб чиқариш учун санксия остидаги бутловчи қисмларни етказиб беришда фойдаланилган.