Литва: Россия қўлга киритилган украин дронларидан фойдаланиши мумкин
Литва мудофаа вазири Робертас Каунаснинг маълум қилишича, Россия Болтиқбўйи минтақасидаги муҳим инфратузилма объектларига ҳужум қилиш эҳтимолини кўриб чиқмоқда. Унинг айтишича, бундай эҳтимолий операцияларда қўлга киритилган украин дронларидан фойдаланилиши мумкин, бироқ ҳозирча тўғридан тўғри таҳдид мавжуд эмас.
Литва мудофаа вазири Робертас Каунаснинг баёнотига кўра, Россия Болтиқбўйи минтақасидаги муҳим инфратузилма объектларига қарши ҳужумлар режалаштираётган бўлиши мумкин.
Вазирнинг сўзларига кўра, Литва разведкаси Москва бундай ссенарийни истисно этмаётганини кўрсатмоқда. Бу ҳолат Россиянинг Болтиқ давлатлари Украинага ўз ҳаво ҳудудидан Россияга зарба беришга рухсат берганлиги ҳақидаги нотўғри тасаввури билан боғлиқ бўлиши мумкин.
Каунаснинг таъкидлашича, эҳтимолий ҳужумларда Россия қўлга киритилган украин учувчисиз учиш аппаратларидан фойдаланиши мумкин. Бу орқали Москва ҳужумлар учун масъулиятни Украинага юклаш, Киевга бўлган ишончни сусайтириш ва НАТО давлатларининг Украинага кўмагига салбий таъсир кўрсатишни мақсад қилган бўлиши мумкин.
Шу билан бирга, Робертас Каунас ҳозирча Болтиқ давлатлари учун тўғридан тўғри ҳарбий таҳдид мавжуд эмаслигини қайд этди.
Россиянинг Украинага қарши кенг кўламли уруши бошланганидан бери Литва, Латвия ва Эстония бир неча бор ўз ҳаво ҳудудига дронлар кириб келгани ҳақида хабар берган. Расмийларнинг баҳолашича, уларнинг айримлари Россияга, айримлари эса эҳтимол Украинага тегишли бўлиб, кўп ҳолларда Россия радиоелектрон кураш воситалари таъсирида белгиланган йўналишдан оғиб кетган.
Бу каби ҳодисалар Болтиқ давлатларида хавфсизлик бўйича хавотирларни кучайтириб, ҳаво мудофааси ва дронларга қарши тизимларни мустаҳкамлашга, шунингдек, НАТОнинг минтақа ҳаво ҳудудини қўриқлаш миссиясини кенгайтиришга туртки бўлган.