Жиззахда профилактика инспектори аёлга куч ишлатганига изоҳ берилди
Жиззахда профилактика инспекторининг аёлга нисбатан куч ишлатгани юзасидан изоҳ берилди. Жиззах вилояти Фориш туманидаги "ҳушёрхона"да содир бўлган воқеа бўйича терговга қадар текширув ҳаракатлари олиб борилмоқда. Бу ҳақда вилоят ИИБ матбуот хизмати маълум қилди.
Ижтимоий тармоқларда аёл киши жанжал қилгани, ИИБ ходими қизга куч ишлатиб, уни ерга ётқизиб ушлаб тургани акс этган видеолар тарқалиб, кенг муҳокамаларга сабаб бўлган эди. Расмий маълумотларга кўра, 5-август куни соат 21:30 атрофида Фориш тумани "Оқтепа" МФЙдаги ресторан ищилари томонидан ИИБга чақирув келиб тушган. Унда маст ҳолатдаги бир гуруҳ шахслар буюртма қилинган таомлар учун тўловни амалга оширмай, тартиббузарлик ва жанжал қилаётгани айтилган.
Воқеа жойига етиб борган профилактика инспекторлари ва Қўриқлаш бўлими ходимлари жамоат тартибини сақлаш вазифасини бажарган. Бироқ, тартиббузарлардан бири (муқаддам судланган аёл) ходимларнинг қонуний талабларига бўйсунмасдан, жанжални давом эттиргани сабабли, белгиланган тартибда тиббий текширувдан ўтказилиб, мастлик ҳолатида бўлган шахсларни вақтинча сақлаш ва реабилитация қилиш пункти – "ҳушёрхона"га жойлаштирилган.
Тиббий кўрик давомида ушбу фуқаронинг танасида ҳеч қандай тан жароҳати аниқланмаган.
Кейинчалик, ушбу фуқаронинг қизи "ҳушёрхона"га келиб, жамоат тартибини бузган ҳолда ходимларга нисбатан турли ҳақоратли сўзлар ишлатиб, уларга тан жароҳати етказишга уринган.
"Ходимлар томонидан юзага келган вазият қонунчиликда белгиланган тартибда бартараф этилиб, фуқароларга нисбатан ҳеч қандай махсус воситалар (қўл кишани, резина таёқ, электрошокер) қўлланмаган", дейилади хабарда.
Ҳозирда мазкур ҳолатда иштирок этган барчанинг хатти-ҳаракатларига ҳуқуқий баҳо бериш мақсадида терговга қадар текширув ҳаракатлари олиб борилмоқда.
"Ички ишлар органлари тўғрисида"ги қонуннинг 22-моддасига кўра, агар куч ишлатилмайдиган усуллар ички ишлар органи ходимининг зиммасига юклатилган мажбуриятларнинг бажарилишини таъминламаса, у қуйидаги ҳолларда жисмоний куч ишлатиш ҳуқуқига эга бўлади:
* жиноятларга ва маъмурий ҳуқуқбузарликларга чек қўйиш учун;
* жиноятлар ёки маъмурий ҳуқуқбузарликлар содир этган шахсларни энг яқиндаги ички ишлар органига ёхуд ҳуқуқни муҳофаза қилувчи бошқа органга олиб бориш ва бу шахсларни ушлаб туриш учун;
* ички ишлар органи ходимининг қонуний талабларига қаршилик кўрсатилишини бартараф этиш учун.
Ҳомиладорлик белгилари сезилиб турган аёлларга, ногиронлик белгилари кўриниб турган шахсларга, ёши аниқ кўриниб турган ёки маълум бўлган вояга етмаганларга нисбатан жисмоний куч ишлатиш тақиқланади.