Жиззахда 77 ёшли таксичини қўй сотиб олиш баҳонасида яйловга олиб бориб ўлдирган йигит 20 йилга қамалди

Жиззахда 77 ёшли таксичини қўй сотиб олишни баҳона қилиб, яйловга олиб бориб ўлдирган йигит 20 йилга қамалди. Бу ҳақда “Дарё” суд ҳужжатларига таяниб хабар берди.

Маълум бўлишича, 1999-йилда Бахмал туманида туғилган, ишсиз Ш.Х. март ойи охирида иш излаб Тошкентдан Самарқанд вилоятига йўл олган. Аммо баъзи сабабларга кўра Ғаллаорол туманида қолиб кетиб, тунни кўчада ўтказган. Тунги бедорликдан сўнг Ш.Х. туман марказидаги такси бекатига келиб, 77 ёшли ҳайдовчи Ж.B.ga тегишли Нехиа-3 автомобилига йўловчи сифатида ўтирган.

Дастлаб улар Самарқанд томон йўл олишган. Бироқ Ш.Х. йўлда ҳайдовчининг чўнтагида пул борлигини кўриб, уни эгаллашга қарор қилган. Шундан сўнг Ж.B.ga фикри ўзгарганини, тоғли ҳудуддан қўй сотиб олишини айтиб, Шароф Рашидов туманидаги аҳоли яшайдиган жойдан узоқ яйловга боришни сўраган. Бунинг учун йўл ҳақига қўшимча 40 минг сўм беришни ваъда қилган.

Манзилга етгач, у қўйларни боғлаш учун кераклигини айтиб, автомобил юкхонасидан икки бўлак сим олган. Кейин Ж.B.ni сой томонга бошлаб бориб, атрофда ҳеч ким йўқлигига ишонч ҳосил қилгач, унинг жағига мушт билан урган. Кутилмаган зарбдан 77 ёшли эркак ерга йиқилган. Шундан сўнг Ш.Х. таксичининг қўл ва оёқларини сим билан боғлаб, бўғиб ўлдирган.

Жиноят содир этилгач, у таксичининг чўнтагидан 150 минг сўм пул, Нокиа 1280 телефони ва автомобил калитини олиб, марҳумнинг Нехиа-3 автомобилида Самарқанд вилоятининг Пастдарғом туманида яшовчи Севинч исмли қиз билан учрашиш учун йўлга чиққан. Йўлда машинага газ қуйиб, пул ишлаш мақсадида йўловчилар олиб, уларни манзилларига етказган.

Ш.Х. Самарқанд шаҳридан ўтаётганда йўл-патрул хизмати ходимлари томонидан тўхтатилиб, процессуал тартибда ушланган.

Жиноят ишлари бўйича Зарбдор туман суди ҳукми билан Ш.Х. Жиноят кодексининг 97-моддаси 2-қисми (“в, и” бандлари, Қасддан одам ўлдириш), 164-моддаси 3-қисми (“а, г” бандлари, Босқинчилик) ва 267-моддаси 1-қисми (Транспорт воситасини олиб қочиш) билан айбдор деб топилган. Унга нисбатан Жиноят кодексининг 59-моддасига асосан тайинланган жазоларни қисман қўшиш йўли билан узил-кесил 19 йил муддатга озодликдан маҳрум қилиш жазоси тайинланган.

Бундан ташқари, Ш.X.ning Жиноят ишлари бўйича Пастдарғом туман судининг 2026-йил 21-майдаги ҳукми билан тайинланган 8 йил муддатга озодликдан маҳрум қилиш жазоси қисман қўшилиб, узил-кесил ўташ учун ҳукмлар мажмуи бўйича 20 йил муддатга озодликдан маҳрум қилиш жазоси тайинланган.

Аввалроқ Наманганда 600 минг сўмлик пул можароси ортидан танишини ўлдирган эркак 13 йилга озодликдан маҳрум этилгани ҳақида хабар берилганди.