Июл ойида истеъмол товарлари ва хизматлар нархи пасайиши кузатилди

Июл ойида истеъмол товарлари ва хизматлар нархларида пасайиш кузатилди. Ўзбекистонда июл ойида 0,1 фоизлик дефляция қайд этилди.

Миллий статистика қўмитасининг маълумотларига кўра, 2026-йилнинг июл ойида истеъмол секторидаги товарлар ва хизматлар нархлари ўртача 0,1 фоизга арзонлашган. Йиллик истеъмол нархлари индекси (ИНИ) 106,4 % ни ташкил этиб, ўтган йилнинг шу ойига (2025-йил июл — 108,9 %) нисбатан 2,5 фоиз бандга пасайган.

Июл ойида озиқ-овқат маҳсулотлари нархлари ўртача 0,91 % га пасайган бўлса, ноозиқ-овқат товарлари 0,3 % га, аҳолига кўрсатиладиган пуллик хизматлар эса 0,5 % га қимматлашгани кузатилди.

Инфляцияга таъсир кўрсатган асосий озиқ-овқат маҳсулотлари орасида сабзи (12,6 %), узун бошоқли гуруч (6,4 %), юмалоқ бошоқли гуруч (6,1 %), мош (4,2 %) ва пиёз (1,7 %) нархларининг ошиши қайд этилди.

Инфляцияни пасайтирувчи омил сифатида эса бақлажон (-42,8 %), булғор қалампири (-39,4 %), помидор (-24,0 %), тарвуз (-20,3 %), картошка (-18,0 %), қовун (-14,5 %), шафтоли (-10,6 %), бодринг (-10,6 %), саримсоқ (-10,0 %), нок (-7,1 %), узум (-6,6 %), олма (-6,6 %), банан (-6,6 %) ва тухум (-5,0 %) нархларининг пасайиши муҳим ҳисса қўшди.

Ноозиқ-овқат маҳсулотлари нархларидан АИ-98 ва АИ-100 маркали бензин (10,0 %), АИ-95 маркали бензин (8,5 %), АИ-92 маркали бензин (3,9 %) нархларининг ошиши кузатилди.

Шунингдек, хизматлар нархи ва тарифларида маиший чиқинди учун ҳақ тўлаш (2,7 %), мобил алоқа хизматлари (2,4 %), шаҳар автобусида йўл ҳақи (1,4 %) нархларининг ошиши асосий омил бўлди.

Ҳисоб-китоблар учун 10 мингдан ортиқ савдо ва хизмат кўрсатиш нуқталаридан 2 миллиондан ортиқ нархлар қайд этилган. Жами 419 турдаги озиқ-овқат ва ноозиқ-овқат маҳсулотлари ҳамда 98 турдаги хизматлар нархлари кузатилди.