Исроил ҳарбийлари Сурия жанубига таҳдидли варақалар ташлади

Исроил ҳарбийлари Сурия жанубига таҳдидли варақалар ташлади.

Исроил армияси Суриянинг жанубий Дераа ва Қунайтра вилоятлари орасидаги Ярмук дарёси ҳудудига самолётлардан таҳдидли варақалар ташлади. Бу ҳудудда Исроил қўшинлари ўз босқинини ва ҳарбий иштирокини кенгайтирмоқда. Бу ҳақда Анадолу агентлиги хабар берди.

Маҳаллий манбаларга кўра, бу воқеа аҳоли Исроил қўшинларининг Сурия ҳудудига киришига тўсқинлик қилиш мақсадида йўлларни тошлар билан тўсиб қўйганидан сўнг содир бўлган.

Варақаларда Исроил армиясига қарши барча ҳаракатларни, жумладан, йўлларни тошлар билан тўсишни тўхтатиш талаб қилинган. Шунингдек, ҳарбийлар минтақадаги фаолиятини мавжуд барча воситалардан фойдаланган ҳолда давом эттириши ҳақида огоҳлантирилган.

Исроил армияси Дераа ва Қунайтрада мунтазам равишда рейдлар ва тинтувлар ўтказиб, назорат-ўтказиш пунктларини ўрнатмоқда ва тинч аҳолини қўлга олмоқда. Бунга жавобан Дераа аҳолиси Исроил қўшинларига огоҳлантириш берди: "Хавфсизлигингиз учун кириш тақиқланади. Биз ўз еримизни бор кучимиз билан ҳимоя қиламиз".

2024-йилда Сурияда Башар Асад режими ағдарилганидан сўнг, Исроил 1974-йилдаги Кучларни ажратиш тўғрисидаги битимни бузган ҳолда Дераа ва Қунайтранинг босиб олинган ҳудудларида ҳарбий постлар ўрнатди. Ўшандан бери у ерда 50 дан ортиқ киши қўлга олинган.

Айни пайтда, Сурия президенти Аҳмад аш-Шараъа мамлакати Исроил билан бир қатор давлатлар воситачилигида хавфсизлик бўйича келишувга эришиш устида ишлаётганини маълум қилди. Унинг айтишича, мазкур келишув келажакда томонлар ўртасида кенг қамровли тинчлик ўрнатишга замин яратиши мумкин.

Президентнинг таъкидлашича, Сурия Исроил билан ҳар қандай тўқнашувдан қочмоқда ва хавфсизлик келишуви инқирозни янада кенгроқ ва ҳар томонлама ҳал этишга йўл очиши мумкин. Шу билан бирга, у бундай келишув Суриянинг Исроил томонидан босиб олинган Голан тепаликларига бўлган даъвосидан воз кечишини англатмаслигини таъкидлади.