Исломий банк фаолиятига ўтишнинг янги тартиби белгиланди
Ўзбекистонда банклар ва микромолия ташкилотларини исломий банк фаолиятига ўтказиш тартиби расман белгиланди. Адлия вазирлиги давлат рўйхатидан ўтказган янги низом кредит ташкилотларининг исломий молия тизимига босқичма-босқич ўтиш механизмларини назарда тутади.
Исломий банк фаолиятига ўтишнинг янги тартиби тасдиқланди.
Адлия вазирлиги Микромолия ташкилоти ва банк фаолиятини ўзгартириш тартиби тўғрисидаги низомга киритилган ўзгартиш ва қўшимчаларни давлат рўйхатидан ўтказди. Ушбу янги ҳужжат Ўзбекистонда исломий банк фаолиятини жорий этишга қаратилган қонун талабларига мувофиқ ишлаб чиқилган.
Низомга кўра, эндиликда микромолия ташкилотини фақат исломий банк фаолиятини амалга оширувчи микромолия банкига, бундай микромолия банкини эса исломий банкка айлантириш тартиби белгиланди. Шунингдек, исломий микромолия банкини қайта микромолия ташкилотига ёки исломий банкни исломий микромолия банкига ўзгартириш имконияти ҳам назарда тутилган.
Ҳужжатга мувофиқ, анъанавий банклар ҳам ўз фаолиятини фақат исломий банк фаолиятини амалга оширувчи банк сифатида қайта ташкил этиши мумкин. Бунда исломий банк мақомини олиш учун қонунчиликда белгиланган талаб ва тартибларга риоя қилиниши шарт.
Шу билан бирга, низомда фақат исломий банк фаолиятини амалга оширувчи микромолия банкигина исломий банк мақомига ўтиш ҳуқуқига эга экани қайд этилган.
Янги тартибга кўра, микромолия банкини давлат рўйхатидан ўтказиш ва тегишли лицензияларни олиш учун унинг биноларида ногиронлиги бўлган шахслар учун қурилиш нормалари ва қоидаларига мувофиқ қулай шарт-шароитлар яратилгани ҳақида Қурилиш ва уй-жой коммунал хўжалиги соҳасида назорат қилиш инспексиясининг хулосаси ҳам талаб этилади.