Индонезияда 271 киши бўлган паром денгизда ёниб кетди (видео)

Индонезияда 2-август куни 271 кишини олиб кетаётган паром денгизда алангага бурканди. ББС расмийларга таяниб хабар беришича, ушбу фожиали ҳодиса натижасида 5 киши ҳаётдан кўз юмган, 41 киши эса бедарак йўқолган.

Кема Сурабаядан Макасарга йўл олган эди. Мадура ороли яқинида ёнғин бошлангач, кема капитани зудлик билан хабар берган. Сурабаянинг қидирув ва қутқарув бўлимига КМП Мутиара Сентоса 2 йўловчи кемасининг ёнаётгани ҳақидаги маълумот соат 08:24 да келиб тушган, аммо ёнғин тахминан эрталабки соат 06:00 дан 07:00 гача бўлган вақтда содир бўлган.

Кейинчалик Миллий қидирув ва қутқарув агентлиги (Басарнас) паромнинг “деярли бутунлай аланга ичида қолгани”ни тасдиқлади. Маълумотларга кўра, 225 киши қутқарилган. Басарнаснинг таъкидлашича, “қидирув-қутқарув операцияси ҳамон давом этмоқда”.

Паромнинг қандай ёниб кетгани ҳозирча номаълум, бироқ ҳодиса эрталабки соатларда юз берган. Ижтимоий тармоқларда тарқалган видеоларда йўловчиларнинг денгизга сакраётгани ва қутқарув нимчасидаги одамлар акс этган.

Эслатиб ўтамиз, 18-июл куни Гаяна қирғоқларида 116 нафар йўловчи ва 17 нафар экипаж аъзоси бўлган МВ Барима пароми чўкиб кетган эди. Ушбу паром 300 дан ортиқ йўловчини сиғдира оладиган лицензияга эга бўлишига қарамай, ҳодиса содир бўлган пайтда ўз оғирлиги доирасида бўлган. Ўшанда 72 киши ҳалок бўлган эди.