Гренландияда Трампга алоқадор нефт компанияси ҳукумат рухсатисиз иш бошлади

Доналд Трамп билан боғлиқ Америка нефт компанияси Гренландия ҳукуматининг рухсатисиз оролда қудуқлар бурғулашга тайёргарлик кўрмоқда. Бу ҳақда Тҳе Гуардиан хабар берди.

АҚШ президенти Трамп Гренландияга нисбатан ўз даъволарини такрорлаётган бир пайтда, оролнинг шарқий қирғоғига бурғулаш ускуналари олиб келинган.

Гренландия ҳукумати ускуналар олиб кирилишига ҳеч қандай рухсат берилмаганини таъкидлаб, бу ҳолатга кескин эътироз билдирди. Ҳукумат баёнотида айтилишича, "логистикага оид барча кейинги масалалар амалга оширилишидан олдин фойдали қазилмалар бошқармаси билан келишилиши ва тасдиқланиши шарт".

2025-йилда Техасда ташкил этилган Греенланд Энергй компанияси ҳудудда 1 триллион долларлик нефт захираси бўлиши мумкинлигини даъво қилмоқда. Компания иккита қудуқ бурғулаш учун 60 миллион доллар ажратишни режалаштирган.

Гренландия 2021-йилда экологик сабабларга кўра янги нефт лицензияларини беришни тўхтатган эди. Бироқ, Британиянинг 80 Миле компанияси илгари ушбу ҳудудда қидирув ҳуқуқини қўлга киритган. Греенланд Энергй эса лойиҳани молиялаштириш эвазига унда кўпчилик улушга эга бўлишини билдирмоқда. Шунга қарамай, ишни бошлаш учун ҳукумат рухсати талаб қилинади.

Маълум бўлишича, июл ойида маҳаллий аҳоли қирғоқда контейнерлар туширилаётганини пайқаган. Юклар Греенланд Энергй компанияси учун олиб келингани тасдиқланган. Компания вакили июн ойидаги учрашувда рухсатнома борлиги ҳақида ёлғон маълумот берганини тан олди.

Гренландия ҳукумати ҳозирча олиб келинган ускуналарни қайтариб юборишни шарт деб ҳисобламаяпти. Рухсатнома бериш бўйича ариза кўриб чиқилмоқда. Компания вакилининг сўзларига кўра, барча рухсатлар олинса, октябр ойида бурғулаш ишлари бошланади.

Аввалроқ, Трамп Гренландия Дания учун эмас, АҚШ учун муҳим эканлигини айтиб, оролни қўшиб олиш ғоясини яна илгари сургани ҳақида хабар берилганди. Унинг сўзларига кўра, АҚШга ушбу Арктика ороли "дунёни ҳимоя қилиш учун" керак.