Германияда ищиларга 35 млрд евро иш ҳақи тўланмай қолган
Германияда иш берувчилар томонидан минимал иш ҳақи бўйича талабларга риоя этилмаслиги 2015-йилдан буён ходимлар, ижтимоий суғурта жамғармалари ва солиқ органларига жами қарийб 64 млрд евро миқдорида зарар етказган. Бу ҳақда 10-август куни дпа агентлиги Германия касаба уюшмалари бирлашмаси (ДГБ) таҳлилига таяниб хабар берди.
Германияда ищиларга 35 миллиард евро миқдорида иш ҳақи тўланмай қолган. Бу ҳақда ДГБ (Германия касаба уюшмалари конфедерацияси) ҳисоб-китоблари маълумот берди. Ушбу маблағ ходимларга қонунда белгиланган минимал иш ҳақи тўлиқ тўланмагани натижасида юзага келган.
Шунингдек, ижтимоий суғурта жамғармалари 22 миллиард евро йўқотган. Бу, асосан, ходимларга расман тўланиши лозим бўлган иш ҳақи камайтириб кўрсатилиши ёки тўлиқ тўланмаслиги сабабли ижтимоий суғурта тизимига етарли миқдорда бадаллар келиб тушмагани билан боғлиқ.
Бундан ташқари, Германия солиқ органлари 7 миллиард евро миқдорида даромад солиғини йиға олмаган.
Касаба уюшмалари бирлашмаси таъкидлашича, айрим ҳолатларда бундай молиявий йўқотишлар иш берувчиларнинг қонунда белгиланган мажбуриятларни бажармаслиги билан боғлиқ жиноий хатти-ҳаракатлар натижаси ҳисобланади.
Ушбу таҳлил ходимлар ўртасида ўтказилган сўров натижасида олинган иш вақти ва даромадлар ҳақидаги маълумотларга асосланган.
ДГБ маълумотларига кўра, Германияда қонуний минимал иш ҳақи жорий этилган 2015-йилдан буён ҳар йили ўртача 2 миллионга яқин ходим белгиланган миқдордан кам иш ҳақи олган. Бундай ходимларга ҳар бир иш соати учун ўртача 1,70 евродан 2,40 еврогача кам ҳақ тўланган.
Натижада ходимлар нафақат жорий даромадининг бир қисмидан маҳрум бўлган, балки улар учун тўланадиган ижтимоий суғурта бадаллари ҳам камайган. Бу эса ижтимоий суғурта жамғармалари тушумларига ҳам салбий таъсир кўрсатган.
Матнда келтирилишича, Германияда қонун билан белгиланган минимал иш ҳақи ҳозирда соатига 13,90 еврони ташкил этади. Ушбу миқдорни фақат қонунда назарда тутилган айрим истисно ҳолатлардагина камайтириш мумкин. Хусусан, баъзи амалиёт ўтовчилар учун алоҳида қоидалар амал қилиши мумкин.
ДГБ таҳлилига кўра, минимал иш ҳақи талабларини четлаб ўтиш фақат ходимларнинг шахсий даромадига эмас, балки давлат бюджети ва ижтимоий суғурта тизимига ҳам миллиардлаб евро миқдорида молиявий йўқотиш келтириб чиқарган.