Франсиядаги ёнғинлар ядровий тадқиқотлар марказига яқинлашди
Франсия жануби-ғарбидаги ўрмон ёнғинлари стратегик аҳамиятга эга объектлар - СЕА Сеста ядровий тадқиқотлар маркази ва “Блайе” атом электр стансиясига яқинлашди. Ҳукумат ва энергетиклар ушбу объектлар хавф остида эмаслигини таъкидламоқда.
**Франсиядаги ёнғинлар ядровий тадқиқотлар марказига яқинлашди**
Франсияни қамраб олган ўрмон ёнғинлари Жиронде департаментидаги Атом ва муқобил энергия манбалари бўйича комиссариатининг (СЕА) СЕА Сеста ядровий тадқиқотлар маркази яқинида авж олди, деб хабар берди АФП агентлиги.
"Барчаси назорат остида, хавотирга ўрин йўқ. Хавфсизлик чоралари таъминланмоқда ва ҳозирги босқичда ҳеч қандай хавф мавжуд эмас", деди СЕА Сеста тадқиқотчиси ва комиссариатнинг коммуникациялар бўйича масъули Филипп Бирссет.
Ядровий тадқиқотлар маркази жойлашган Барп коммунаси мерининг биринчи ўринбосари Жак Мореттонинг сўзларига кўра, марказ фаолияти ядровий тийиб туриш билан боғлиқ.
"Бу ерда қиймати бир неча миллиард еврога тенг бўлган Ласер Мéгажоуле ҳам жойлашган. У стратегик объект ҳисобланади. Шундай экан, бу Барп учун маълум маънода устунликдир, уни ҳимоя қилишга алоҳида эътибор қаратилмоқда", деди у.
Ле Парисиен нашрининг ёзишича, ёнғинлар Жиронде шаҳридаги "Блайе" атом электр стансиясидан 45 километр масофада ҳам тарқалган.
"Франсиядаги атом электр стансиялари тошқинлар, қурғоқчилик, кучли совуқлар ёки ғайриоддий иссиқ каби экстремал об-ҳаво шароитларининг оқибатларига бардош бера оладиган қилиб лойиҳалаштирилган", дейилади Франсиянинг энг йирик ЭДФ давлат энергетика компанияси баёнотида.
Мамлакат ички ишлар вазири Лоран Нунес "ёнғин фронти ортида жойлашган нозик объектлар" муҳофазаси кучайтирилганини билдирди. Унинг сўзларига кўра, ушбу объектлар атрофида ёнғинга қарши ҳимоя йўлаклари барпо этилган, кузатув патруллари ва йирик ёнғин ўчириш кучлари жойлаштирилган.
Франсияда кучли ўрмон ёнғинлари июл ойининг иккинчи ярмида Европани қамраб олган фавқулодда иссиқ об-ҳаво фонида бошланди. Табиий офатнинг асосий ўчоқлари Бордо шаҳри яқинидаги Жиронде ва қўшни Ланд департаментлари бўлмоқда. Шунингдек, мамлакат жануби-шарқидаги Вар департаментида ҳам йирик ёнғинлар қайд этилган.
Франсия президенти Эммануел Макрон мамлакат Иккинчи жаҳон урушидан бери кузатилмаган даражадаги ўрмон ёнғинларига дуч келганини айтди.
Л'Индéпендант нашри маълумотига кўра, ёнғинларни ўчириш ишларига 2 750 нафардан ортиқ ўт ўчирувчи, қарийб 1 500 нафар ҳарбий хизматчи, 1 440 нафар ички хавфсизлик ходими, 20 га яқин авиация техникаси жалб қилинган. Тўқсон нафарга яқин ўт ўчирувчи жароҳатланган. Аҳоли орасида қурбонлар йўқ, 240 та уй вайрон бўлган.
Жиронде шаҳридаги ёнғинлар 42 минг гектар ўрмонни йўқ қилган. Франсия бош вазири Себастян Лекорнюнинг маълум қилишича, йил бошидан буён мамлакат бўйлаб 116 минг гектардан зиёд майдон ёнғиндан зарар кўрган. Бу 2022 йилдаги йирик ёнғинлардан кейинги энг юқори кўрсаткич ҳисобланади. Жиронде шаҳридаги ёнғинлар сабабли 220 минг нафар аҳоли хавфсиз ҳудудларга эвакуация қилинган.