Фарғонада собиқ турмуш ўртоғига шилқимлик қилган эркак 5 суткага қамалди

Фарғона вилоятининг Ўзбекистон туманида собиқ хотинига шилқимлик қилган эркак 5 суткага қамоқ жазосига ҳукм қилинди. Шу билан бирга, жабрланувчини ҳақорат қилган унинг кундоши жаримага тортилди. Бу ҳақда “Дарё” нашри суд ҳужжатларига таяниб хабар берди.

Маълум бўлишича, ҳодиса 2026-йил 18-апрел куни Яйпан шаҳридаги автостансияда юз берган. 1991-йилда туғилган А.Э. собиқ турмуш ўртоғини кўриб қолиб, уни четга тортган ва танасининг турли жойларидан ушлаб, унга нисбатан шаҳвоний шилқимлик қилган.

Жабрланувчи суд мажлисида собиқ эри уни ўзига тортиб, ўпмоқчи бўлганини, шундан сўнг уни итариб юборганини маълум қилган. Шунингдек, ўша куни кечқурун эркакнинг иккинчи хотини – жабрланувчининг кундоши унга қўнғироқ қилиб, шаъни ва қадр-қимматини камситувчи сўзлар билан ҳақорат қилган.

Судда эркак ҳам, унинг иккинчи хотини ҳам ўз қилмишларини тан олиб, пушаймонликларини билдирган ва енгиллик сўраган.

Жиноят ишлари бўйича Ўзбекистон туман судининг қарорига кўра, А.Э. Маъмурий жавобгарлик тўғрисидаги кодекснинг 41-1-моддасида назарда тутилган ҳуқуқбузарликни содир этган деб топилди. Унга нисбатан 5 сутка маъмурий қамоқ жазоси тайинланди.

Жабрланувчини ҳақорат қилган кундоши эса МЖКнинг 41-моддаси билан айбдор деб топилиб, базавий ҳисоблаш миқдорининг 5 баравари, яъни 2 миллион 60 минг сўм миқдорида жаримага тортилди.

Аввалроқ Самарқанд вилояти Паст Дарғом туманида турмуш ўртоғига шилқимлик қилган эркак жаримага тортилган эди. Олмазор туманида эса собиқ турмуш ўртоғига нисбатан шилқимлик қилган 32 ёшли эркакка уч суткага қамоқ жазоси берилган эди. Тошкент шаҳрида жанжал туфайли собиқ турмуш ўртоғининг қўлидан тишлаб олган аёл жаримага тортилган, эркак эса 5 суткага қамалган эди.