Эркак 9 минг метр баландликда самолёт эшигини очишга уринди (видео)

**Эркак 9 минг метр баландликда самолёт эшигини очишга уринди (видео)**

Малайзиядан Ҳиндистонга парвоз қилаётган йўловчи самолётида фавқулодда вазият юзага келди: бортдаги эркак 9 минг метр баландликда самолётнинг фавқулодда чиқиш эшигини очишга ҳаракат қилди. Бу ҳақда Тҳе Сун нашри хабар берди.

Воқеа 36 ёшли Жамшир Атаникал исмли шахс томонидан содир этилган. Унинг фавқулодда чиқиш люкини очишга уриниши акс этган кадрлар ижтимоий тармоқларда кенг тарқалди.

Видеода Батик Аир авиакомпанияси ходимлари саросимага тушган йўловчилар кўз ўнгида эркакни тўхтатишга уринаётгани кўрсатилган. Жамшир люкни очишга ҳаракат қилаётганида атрофдагиларга ҳам таҳдид қилган. Якунда экипаж аъзолари ва бошқа йўловчилар уни зарарсизлантириб, қўлларини боғлаб қўйишга муваффақ бўлишган.

Кочи аеропорти полициясининг маълумотларига кўра, ҳодиса соат 21:30 дан 23:00 гача бўлган парвоз оралиғида юз берган. Полиция хабарида шундай дейилади:

"Жамшир 12А ўриндиғида ўтирган эди. У ҳеч қандай сабабсиз фавқулодда чиқиш эшигини очишга ҳаракат қилиб, иллюминатор панелига шикаст етказган. Шунингдек, уни тўхтатмоқчи бўлган йўловчилар ва экипажга таҳдид қилган."

Полиция томонидан сўроқ қилинганида Жамшир ўз хатти-ҳаракатларини "ўша лаҳзада шундай қилгиси келгани" билан изоҳлаган. У "парвоз пайтида ўлгиси келганини" ҳам айтган. Шу билан бирга, эркак янги туғилган фарзандини кўриш учун уйига учаётгани аниқланган.

Самолёт аеропортга қўнгач, Жамшир ҳибсга олинган. Унинг хатти-ҳаракатлари бортдагиларнинг ҳаётига тўғридан-тўғри хавф солгани сабабли унга одам ўлдиришга уриниш айблови илгари сурилган. Парвоз экипажи эса Малайзияга қайтиб кетган ва улардан кўрсатма бериши кутилмоқда.

Аввалроқ АҚШнинг Жорж Буш номидаги халқаро аеропортида бомба портлатиш билан таҳдид қилган эркак ушланган эди. Шунингдек, британиялик 97 ёшли кўзи ожиз аёл самолёт қанотида учиб рекорд ўрнатганди.