Энди экологик экспертиза фақат рухсат бериш эмас – экологик хавфларни олдиндан бошқариш тизимига айланмоқда
Оммавий ахборот воситалари учун контент тайёрлаш марказида Вазирлар Маҳкамасининг “Атроф-муҳитга таъсирни баҳолашнинг янги механизмларини жорий
Экологик экспертиза эндиликда шунчаки рухсат бериш эмас, балки экологик хавфларни олдиндан бошқариш тизимига айланмоқда.
Вазирлар Маҳкамасининг 2026-йил 11-майдаги "Атроф-муҳитга таъсирни баҳолашнинг янги механизмларини жорий қилиш чора-тадбирлари тўғрисида"ги 234-сонли қарорининг мазмун-моҳиятини кенг жамоатчиликка етказиш мақсадида Оммавий ахборот воситалари учун контент тайёрлаш марказида матбуот анжумани ташкил этилди.
Экология ва иқлим ўзгариши миллий қўмитаси ҳузуридаги Давлат экологик экспертизаси маркази томонидан уюштирилган ушбу тадбирда экология соҳаси мутахассислари, лойиҳа ишлаб чиқувчилар, тадбиркорлар, ОАВ вакиллари ва блогерлар иштирок этишди.
Матбуот анжуманида мамлакатда экологик хавфсизликни таъминлаш, табиий ресурслардан оқилона фойдаланиш ҳамда атроф-муҳитга салбий таъсирни камайтириш давлат сиёсатининг устувор йўналишларидан бири эканлиги алоҳида таъкидланди.
Давлат экологик экспертизаси маркази Бош директори Ғ.Мухамедовнинг сўзларига кўра, "Мазкур қарор билан давлат экологик экспертизаси ва атроф-муҳитга таъсирни баҳолаш, жамоатчилик эшитувлари ва жамоат экологик экспертизасини ўтказиш, стратегик экологик баҳолаш ҳамда экологик ҳужжатларни ишлаб чиқувчилар фаолиятини тартибга солишнинг янги механизмлари белгиланди. Ушбу қарорни ишлаб чиқишда Япония, Германия, Жанубий Корея, Европа Иттифоқи давлатлари, Канада, АҚШ, Туркия, Грузия, Сингапур, Россия Федерацияси ва Қозоғистон каби хорижий давлатларнинг экологик экспертиза соҳасидаги қонунчилиги ҳамда амалиёти ўрганилди."
Тадбирда янги қарор билан атроф-муҳитга таъсирни баҳолаш тизими халқаро ёндашувлар асосида такомиллаштирилгани, лойиҳалар хавфлилик даражасига қараб баҳоланиши, скрининг ва скопинг босқичлари жорий этилиши, углерод изи ва иссиқхона газлари эмиссиясини баҳолаш, жамоатчилик иштироки ҳамда лойиҳа ишлаб чиқувчиларнинг масъулияти кучайтирилиши ҳақида маълумот берилди.
Матбуот анжумани якунида соҳа мутахассислари журналистларни қизиқтирган саволларига жавоб беришди.